Pune Police News हडपसर, ता. ७ : न्यायालयातून पोलीस कोठडी मिळाल्यानंतर आरोपीने थेट पोलिसांच्या तावडीतून पळ काढण्याचा प्रयत्न केल्याची धक्कादायक घटना हडपसरमध्ये घडली. मात्र, डीबी पथकाच्या सतर्कता आणि शिताफीमुळे आरोपीचा डाव फसला असून, काही क्षणांतच त्याला पुन्हा ताब्यात घेण्यात पोलिसांना यश आले. Pune Police News
हडपसर पोलीस स्टेशन येथे कार्यरत पोलीस हवालदार दिपक आनंद कांबळे यांनी याप्रकरणी फिर्याद दिली आहे. ते गेल्या तीन वर्षांपासून डीबी पथकात कार्यरत आहेत. मिळालेल्या माहितीनुसार, हडपसर पोलीस ठाण्यात दाखल असलेल्या गुन्ह्यात आरोपी अब्दुल तौफिक शेख (रा. साडेसतरानळी, हडपसर) आणि उमर फारुख नदाफ (रा. मगरपट्टा ब्रिजखाली, हडपसर) यांना अटक करण्यात आली होती. आरोपींना न्यायालयात हजर करून पोलीस कोठडी मिळवण्यासाठी डीबी पथकातील अधिकारी आणि कर्मचाऱ्यांची विशेष पार्टी नेमण्यात आली होती. Pune Police News
पोलीस हवालदार दिपक कांबळे यांच्यासह जाधव, खटके, केसकर आणि झंजार हे कर्मचारी आरोपींना घेऊन जिल्हा व सत्र न्यायालय, शिवाजीनगर येथे गेले होते. न्यायालयाने आरोपी अब्दुल तौफिक शेख याला १७ मे २०२६ पर्यंत पोलीस कोठडी सुनावली. यानंतर आरोपींना घेऊन पोलिसांचे शासकीय वाहन हडपसरकडे निघाले. सायंकाळी गांधी चौक येथील सिग्नलवर वाहन थांबले असताना सिग्नल सुटल्यावर वाहनाचा वेग कमी असल्याचा फायदा घेत आरोपी अब्दुल तौफिक शेख याने हातातील बेडीसह पळून जाण्याचा प्रयत्न केला.
मात्र, पोलिसांनी तत्काळ प्रसंगावधान राखत आरोपीचा पाठलाग केला आणि काही अंतरावरच त्याला शिताफीने पुन्हा ताब्यात घेतले. या प्रकारामुळे काही काळ गांधी चौक परिसरात खळबळ उडाली होती. या प्रकरणी आरोपी अब्दुल तौफिक शेख याच्याविरोधात भारतीय न्याय संहिता (BNS) कलम २६२ अन्वये गुन्हा दाखल करण्यात आला असून पुढील तपास सुरू आहे.
