Pune News : येरवडा, (पुणे) : चारित्र्याच्या संशयावरून पतीने-पत्नीचा चाकूच्या सहाय्याने गळा चिरून खून केल्याची घटना खराडी परिसरात घडली आहे. याप्रकरणी खराडी पोलिसांनी आरोपी पतीला बेड्या ठोकल्या आहेत.
लक्ष्मी केशव सीताफळे (वय ४०) असे खून झालेल्या महिलेचे नाव आहे. केशव भीमराव सीताफळे (वय.४५, रा.पाटील बुवा नगर,खराडी) असे अटक केलेल्या आरोपी पतीचे नाव आहे. या प्रकरणात चंद्रकांत धर्माण्णा बनसोडे (वय ४७, रा. खराडी गाव) यांनी तक्रार दिली आहे..
धारधार चाकूने वार
पोलिसांनी दिलेल्या माहितीनुसार, खराडी परिसरातील लेबर कॅम्पमध्ये सीताफळे कुटुंब भाड्याने राहण्यास आहेत. आरोपी केशव याला दारूचे व्यसन असून, तो सतत पत्नी लक्ष्मी हिच्यावर चारित्र्याच्या संशयावरून भांडणे करून मारहाण करीत होता. बुधवारी रात्री केशवने पत्नीसोबत भांडणे केली.
पत्नी आणि बारा वर्षाचा मुलगा रात्री झोपले असताना केशवने घरातील धारधार चाकूने पत्नी लक्ष्मीच्या गळ्यावर वार केले. त्यामुळे लक्ष्मी जोराने ओरडत जीव वाचवण्यासाठी घराबाहेर आली. गळ्यातून मोठ्या प्रमाणावर रक्त स्राव झाल्याने लक्ष्मी घराच्या बाहेर पडली.
चाकू हल्ल्यात पत्नी रक्ताच्या थारोळ्यात पडल्याचे दिसल्याने घाबरलेला केशवची नशा उतरली. त्याने धावतच शेजारील खराडी पोलिस चौकी गाठून पत्नी रक्ताच्या थारोळ्यात पडल्याचे सांगितले आणि पोलिसांना घरी घेऊन गेला. पोलिसांनी तातडीने रुग्णवाहिका आणि डॉक्टरांना घटनास्थळी बोलावून घेतले.
दरम्यान, डॉक्टरने तपासणी केली असता लक्ष्मीचा मृत्यू झाल्याचे घोषित केले. त्यामुळे पोलिसांनी लगेचच आरोपी पतीला ताब्यात घेऊन अटक केली. आरोपी केशव हा बिगारी असून, पत्नी लक्ष्मी धुणी भांडी करून कुटुंबाचा उदरनिर्वाह चालवत होती.
