Pune News | पुणे : चौथ्या मजल्यावरुन पडून तरुणीचा दुर्दैवी मृत्यू झाल्याची घटना शहरातील सिंहगड रोडवरील किरकटवाडी येथून समोर आली आहे. वाळत घातलेले कपडे खालच्या मजल्यावरील गॅलरीत पडल्याने तोल जाऊन ही घटना घडली आहे. ही तरुणी पंधरा दिवसांपूर्वी मावसबहिणीकडे राहण्यास आली होती. तिथेच ही घटना घडली आहे. या घटनेनंतर परिसरात हळहळ व्यक्त केली जात आहे.
आकांक्षा गोपाल सिंग (वय २३, रा. समर्थ सिटी, शिवनगर, किरकटवाडी ) असे मृत्युमुखी पडलेल्या तरुणीचे नाव आहे.
मिळालेल्या माहितीनुसार, आकांक्षा ही गॅलरीत वाळत घातलेले कपडे आणण्यासाठी गेली होती. तेव्हा वाळत घातलेल्या कपड्यापैकी काही कपडे हे खालच्या मजल्यावरील गॅलरीत पडले होते. तेव्हा ते कपडे काढण्यासाठी आकांक्षाने चौथ्या मजल्यावरील गॅलरीत साडी बांधली आणि खाली उतरण्यास सुरुवात केली. त्यावेळी तोल जाऊन ती खाली कोसळली. यावेळी काहीतरी पडल्याचा तेथे खेळत असलेल्या मुलांना आवाज आला तेव्हा मुलांना आकांक्षा रक्ताच्या थारोळ्यात पडली दिसून आली.
दरम्यान, या मुलांनी आरडाओरड केल्यानंतर इमारतीतील नागरिकांनी घटनास्ठळी धाव घेतली. तसेच आकांक्षाच्या नातेवाईकांना घटनेची माहिती दिली. तेव्हा लागलीच तिचे नातेवाईक तेथे पोहोचले व त्यांनी याबाबत पोलीसांना माहिती दिली.
या प्रकरणी हवेली पोलीस ठाण्यात अकस्मात मृत्यू अशी नोंद करण्यात आली आहे. पुढील तपास पोलीस करत आहेत.
