Pune News: लोणीकंद, (पुणे) : दुचाकीवरून आलेल्या तिघांनी टेम्पोचालकास थांबायला भाग पाडून त्याच्यावर कोयत्याने वार करून ५ लाख ५० हजार रुपयांची रोख रक्कम व मोबाईल लुटून नेल्याची घटना घडली आहे. शनिवारी (ता. ०३) सकाळी सव्वा सहा वाजण्याच्या सुमारास तुळापूर येथील इंद्रायणी नदीवरील पुलाजवळ हि घटना घडली आहे. या घटनेने परिसरात खळबळ उडाली असून नागरिकांमध्ये घबराटीचे वातावरण पसरले आहे.
याबाबत रियाज चांदभाई मुलाणी (वय ४१, रा. वाडेबोल्हाई, वाडेगाव) यांनी लोणीकंद पोलीस ठाण्यात फिर्याद दिली आहे. त्यानुसार अज्ञात तीन चोरट्यांच्या विरोधात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, चाकण येथे दर शनिवारी आठवडे बाजार असतो. या बाजारासाठी रियाज मुलानी व त्यांचा साथीदार राजेंद्र जाधव हे टेम्पोमधून जात होते. इंद्रायणी पुलाजवळ दुचाकीवरुन आलेल्या तिघांना टेम्पोला दुचाकी आडवी लावून थांबायला भाग पाडले. फिर्यादी यांना हाताने मारहाण करुन त्यांच्यावर कोयत्याने वार केले. त्यांच्या खिशातील ५ लाख ५० हजार रुपये व मोबाईल जबरदस्तीने हिसकावून घेऊन ते पळून गेले.
दरम्यान, हल्लेखोरांना फिर्यादी यांच्याकडे इतके पैसे आहेत, याची माहिती असावी. त्यातूनच पाठलाग करुन त्यांना लुटल्याचा पोलिसांचा संशय आहे. सहायक पोलीस निरीक्षक गोडसे तपास करीत आहेत
