जीवन सोनवणे
Pune News: शिरवळ: सातारा-पुणे महामार्गावरील खंडाळा तालुक्यातील धनगरवाडी गावच्या हद्दीत आयशर टेम्पो व ट्रकचा भीषण अपघात झाला. यामध्ये तीन जणांचा जागीच मृत्यू झाला. मृत व्यक्तींची नावे अद्याप समजले नसून घटनेची नोंद शिरवळ पोलीस स्टेशनला झालेली आहे.
आयशर टेम्पो व ट्रकचा भीषण अपघात
सातारा-पुणे महामार्गावरील धनगरवाडी (ता.खंडाळा) गावच्या हद्दीत असणाऱ्या मोटे वस्ती समोर पुढे उभा असणाऱ्या टेम्पोला पाठीमागून मालट्रकने जोरदार धडक दिल्याने मालट्रकमधील तीन जण जागीच ठार झाले. ही घटना बुधवारी रात्री घडली असून, कर्नाटक बेंगलोर येथून शेतीचा माल मुंबई, वाशीकडे घेऊन जाणारा (के.ए. 22 ए. ए. 1551) हा आयशर टेम्पो धनगरवाडी ता.खंडाळा गावच्या हद्दीत असणाऱ्या मोटे वस्ती समोर रस्त्याच्या कडेला उभे असलेला (के. ए. 53 सी 8343) या ट्रकला पाठीमागे जाऊन धडकला. हा अपघात इतका भीषण होता की, आयशर टेम्पोचा पुढील भाग पूर्णपणे दबला गेला होता. दबले गेलेल्या भागामध्ये गाडीचा ड्रायव्हर व दोन हमाल हे तिघे पूर्णपणे दबले गेले व त्यांचा जागीच मृत्यू झाला.
या घटनेचे गांभीर्य लक्षात घेता शिरवळ पोलीस स्टेशन, शिरवळ रेस्क्यू टीम, एस. के. फाउंडेशन व धनगरवाडी ग्रामस्थ व शिरवळ ग्रामस्थ यांनी घटनास्थळी धाव घेतली. तसेच त्या ठिकाणी झालेल्या अपघातात अडकलेल्या मृतदेह क्रेन जेसीबीच्या साह्याने बाहेर काढण्यास मदत करण्यात आली. या अपघातानंतर काही काळ महामार्गावर वाहतूक विस्कळीत झाली होती. मात्र, मृतदेह बाहेर काढल्यानंतर लगेचच वाहतूक महामार्ग पोलिसांच्या मार्फत सुरळीत करण्यात आली.
दरम्यान, पोलीस अधिकारी फुलारी व पोलीस अधीक्षक शेख यांनी घटनास्थळी भेट दिली आणि पाहणी केली. या घटनेची नोंद शिरवळ पोलीस स्टेशनला झाले असून, पुढील तपास शिरवळ पोलीस करत आहेत.
