Pune News फुरसुंगी, ता. ९ : पुणे शहरालगतच्या फुरसुंगी परिसरात गुंडगिरीची धक्कादायक घटना समोर आली आहे. “मी इथला भाई आहे… माझ्यावर चार गुन्हे दाखल आहेत,” अशी दहशत निर्माण करत चौघांनी मिळून दहावीच्या विद्यार्थ्यावर भररस्त्यात जीवघेणा हल्ला केल्याची खळबळजनक घटना उघडकीस आली आहे. हि घटना चंदवाडी रोडवरील कुस्ती आखाड्याजवळ ७ मे रोजी सकाळी साडेनऊ च्या सुमारास घडली आहे. आरोपींनी विद्यार्थ्याला काठ्यांनी बेदम मारहाण करत त्याचा मोबाईल फोडला आणि “आमच्याविरोधात तक्रार केली तर तुला जिवंत सोडणार नाही,” अशी धमकी दिल्याने परिसरात भीतीचे वातावरण निर्माण झाले आहे. Pune News
या प्रकरणी तेजस कामठे (वय १६) या अल्पवयीन विद्यार्थ्याने फुरसुंगी पोलीस ठाण्यात फिर्याद दिली आहे. त्यानुसार स्वप्नील भालेराव (वय १९), विवेक कामठे (वय १७), दादया खोमणे (वय १८) आणि एका १५ वर्षाच्या अल्पवयीन मुलाच्या विरोधात भारतीय न्याय संहिता २०२३ अंतर्गत कलम ११५(२), ११८(१), ३(५), ३२४(४), ३५१(३), ३५२ अन्वये गुन्हा दाखल करण्यात आला आहे. Pune News
पोलिसांनी दिलेल्या माहितीनुसार, तेजस कामठे हा शिवशंभो महादेव न्यू इंग्लिश स्कूल, फुरसुंगी येथे दहावीचे शिक्षण घेत आहे. ७ मे रोजी सकाळी साडेनऊच्या सुमारास तो दुचाकीवरून मांजरी येथे कामासाठी जात होता. चंदवाडी रोडवरील कुस्ती आखाड्याजवळून जात असताना आरोपी त्यांच्याकडील वाहनातून फुरसुंगीच्या दिशेने येत होते. तेजस त्यांना क्रॉस करून पुढे गेल्यानंतर आरोपींनी वाहन वळवून त्याचा पाठलाग सुरू केला. काही अंतरावर त्याला जबरदस्तीने थांबवण्यात आले. “तू आम्हाला कट का मारला?” असा जाब विचारत आरोपींनी त्याच्यावर शिवीगाळ सुरू केली. तेजसने आपण कोणालाही कट मारला नसल्याचे सांगितले असता आरोपी अधिकच आक्रमक झाले. Pune News
यावेळी मुख्य आरोपी स्वप्नील भालेराव याने “तू आम्हाला ओळखत नाहीस का? मी इथला भाई आहे. माझ्यावर चार गुन्हे आहेत. माझ्या नादाला लागलास तर कार्यक्रम करतो,” अशी धमकी देत हातातील काठीने तेजसच्या डोक्यावर, पाठीवर आणि हातावर सपासप वार केले. इतर आरोपींनीही लाथाबुक्क्यांनी बेदम मारहाण केली. या हल्ल्यात तेजसच्या डाव्या कानामागे गंभीर जखम झाली असून रक्तस्राव झाला. ओठांनाही जबर मार लागून रक्त आले, तर पाठीवर काठीचे काळेनिळे वळ उठल्याचे फिर्यादीत नमूद करण्यात आले आहे.
दरम्यान, मारहाण सुरू असताना तेजसने घरी फोन करण्याचा प्रयत्न केला. मात्र आरोपी दादया खोमणे याने त्याचा मोबाईल हिसकावून जवळील भिंतीवर आपटत फोडून टाकला. त्यानंतर “आमच्याविरोधात केस केली तर तुला मारून टाकू,” अशी धमकी दिली. घटनास्थळी नागरिक जमा होऊ लागल्याचे पाहून आरोपी तेथून पसार झाले. Pune News
जखमी अवस्थेत तेजस थेट फुरसुंगी पोलीस ठाण्यात पोहोचला. पोलिसांनी त्याला वैद्यकीय तपासणीसाठी ससून रुग्णालयात पाठवले. उपचारानंतर दुसऱ्या दिवशी त्याने अधिकृत तक्रार दाखल केली आहे. त्यानुसार चार जणांच्या विरोधात गुन्हा दाखल करण्यात आला असून फुरसुंगी पोलीस पुढील तपास करत आहेत. भररस्त्यात अल्पवयीन विद्यार्थ्यावर झालेल्या या हल्ल्यामुळे फुरसुंगी परिसरात संतापाची लाट उसळली आहे. “शहरात अल्पवयीन टोळ्यांची दहशत वाढतेय का?” असा सवाल नागरिकांकडून उपस्थित केला जात आहे.
