Pune News : धायरी, (पुणे) : दारूच्या नशेत नऱ्हे पोलिस चौकीत येऊन पोलिस कर्मचाऱ्यांशी अरेरावी, शिवीगाळ करत शासकीय कामात अडथळा निर्माण केल्याप्रकरणी एका महिलेविरोधात गुन्हा दाखल करण्यात आला आहे. शितल गोरे (वय ४१, रा. मानाजीनगर, नऱ्हे) असे संबंधित महिलेचे नाव आहे. Pune News
पोलिसांनी दिलेल्या माहितीनुसार, संबंधित महिला तक्रार देण्यासाठी चौकीत आली होती. यापूर्वी तिच्या सांगण्यावरून एका व्यक्तीविरुद्ध अदखलपात्र गुन्हा नोंदविण्यात आला होता. मात्र, नियमित गुन्हा दाखल का करण्यात आला नाही, यावरून ती संतप्त झाली आणि चौकीत मोठ्याने आरडाओरडा करत पोलिस कर्मचाऱ्यांशी वाद घालू लागली. Pune News
महिलेने पोलिसांना शिवीगाळ करत चौकीतील कामकाजात अडथळा निर्माण केला. बाहेर जाण्यास सांगूनही ती ऐकत नसल्याने काही काळ चौकीतील कामकाज विस्कळीत झाले. या प्रकारामुळे इतर तक्रारदारांनाही गैरसोयीचा सामना करावा लागला. परिस्थिती नियंत्रणाबाहेर जात असल्याने महिला पोलिस कर्मचाऱ्यांच्या मदतीने तिला ताब्यात घेण्यात आले. Pune News
त्यानंतर महिलेला वैद्यकीय तपासणीसाठी ससून रुग्णालयात पाठविण्यात आले. डॉक्टरांनी ती मद्यधुंद अवस्थेत असल्याचा अहवाल दिल्यानंतर पोलिसांनी तिच्याविरोधात शासकीय कामात अडथळा आणणे व गोंधळ घालणे आदी कलमान्वये गुन्हा दाखल केला. Pune News
दरम्यान, संबंधित महिला यापूर्वीही विविध पोलिस ठाण्यांमध्ये जाऊन गोंधळ घालत असल्याची माहिती पोलिसांनी दिली आहे. नऱ्हे पोलिस चौकीतील संपूर्ण प्रकार सीसीटीव्हीत कैद झाला असून पुढील तपास पोलिस उपनिरीक्षक अमोल मालुसरे करीत आहेत. पोलिस ठाणे किंवा चौकी परिसरात मद्यधुंद अवस्थेत येऊन गोंधळ घालणाऱ्यांविरोधात कठोर कारवाई करण्यात येईल, असा इशाराही पोलिसांनी दिला आहे. Pune News
