Pune News : पुणे : सासूने सुनेला नकटी म्हटल्याने रागाच्या भरात सुनेने थेट सासूवर चाकूने हल्ला केल्याची घटना पुण्यातील येरवडा परिसरात घडली आहे. या घटनेत सासू गंभीर जखमी झाली असून सुनेच्या विरोधात येरवडा पोलीस ठाण्यात गुन्हा दाखल करण्यात आला आहे.
संध्या अशोक मगर (वय ४५, रा. गणेश नगर, येरवडा) असे सुनेचे नाव आहे. तर मालनबाई परशुराम मगर (वय ७५) असे सासूचे नाव आहे.
पोलिसांनी दिलेल्या माहितीनुसार, मगर कुटुंब येरवडा येथील गणेश नगरमध्ये राहतात. एकाच घरात राहत असल्यामुळे कधी कधी त्यांच्यात सासू-सुनेमधील भांडणे झाली होती. या दोघी घरामध्ये असताना संध्या ही मालनबाई यांना ‘तू नकटी आहेस’ असे बोलली. त्यावर मालनबाई यांनी सुद्धा चिडून तिला ‘तू पण नकटीच आहेस’ असे म्हटले.
दरम्यान, नकटी म्हटल्याचा सुनेला प्रचंड राग आला. रागाच्या भरात तिने सासूवर चाकूने हल्ला केला. या घटनेत सासू गंभीर जखमी झाली आहे. याप्रकरणी सुनेवर गुन्हा दाखल करण्यात आला आहे. तपास पोलीस करीत आहेत.
