पुणे : पुण्यातील बहुचर्चित डॉ. दीपक महाजन हत्याकांड प्रकरणात लीना देवस्थळी व तिची मुलगी दीप्ती यांना पुणे सत्र न्यायालयाने ठोठावलेली फाशीची शिक्षा मुंबई उच्च न्यायालयाने रद्द करून, जन्मठेपेची शिक्षा ठोठावली होती. आता या जन्मठेप झालेल्या लीना अनिल देवस्थळी (वय 65) हिची 19 वर्षे तुरुंगवास भोगल्यानंतर नुकतीच सुटका करण्यात आल्याची माहिती समोर आली आहे.
नेमकं काय आहे प्रकरण?
पुण्यातील प्रभात रस्त्यावर राहणारे डॉ. दीपक महाजन यांचे जुलै 2006 मध्ये अपहरण करून, 25 लाख रुपयांची खंडणी मागण्यात आली होती. त्यानंतर त्यांचा निर्घृण खून करून त्यांच्या शरीराचे आठ तुकडे करून, कात्रजच्या घाटात व लोणावळ्यात फेकून देण्यात आल्याचे उघडकीस आले होते. पुणे पोलिसांच्या तपासात लीना देवस्थळी व दीप्ती देवस्थळी या मायलेकींनी हा खून केल्याचे निष्पन्न झाले. त्यानंतर या मायलेकींना दोषी ठरवून पुणे सत्र न्यायालयाने फाशीची शिक्षा सुनावली होती.त्याविरोधात या मायलेकींनी मुंबई उच्च न्यायालयात धाव घेतली होती.मात्र या प्रकरणात लीना व दीप्ती यांना डॉ. महाजनांचे खंडणीसाठी अपहरण करणे व कट रचल्याप्रकरणी दोषी ठरविण्यात आले. मात्र, त्यांनी खून केल्याचे सिद्ध करण्यासाठी पुरेसे पुरावे नसल्याचे कारण देऊन, उच्च न्यायालयाने सप्टेंबर 2009 मध्ये देवस्थळी मायलेकींना ठोठावलेली फाशीची शिक्षा रद्द करून, जन्मठेपेची शिक्षा सुनावली होती. त्यानंतर आता तब्बल 19 वर्षानंतर लीना देवस्थळींची तुरुंगातून सुटका करण्यात आली आहे.
राज्याच्या गृह विभागाने 65 वर्षांवरील वयस्कर व अशक्त पुरुष बंदी आणि साठ वर्षांवरील अशक्त महिला बंद्यांना मुक्त करण्याबाबत 10 जानेवारी 2006 रोजी शासन निर्णय प्रसिद्ध केला आहे. या शासन निर्णयाचा आधार घेऊन, येरवडा मध्यवर्ती कारागृहात असलेल्या लीना देवस्थळीने पुणे जिल्हा विधी सेवा प्राधिकरणाच्या माध्यमातून सुटकेसाठी अर्ज केला होता.
9:41 am
