Pune Crime : पुणे शहरातील सिंहगड रोड परिसरात तीन दिवसांपूर्वी झालेल्या तरुणाच्या क्रूर हत्येप्रकरणी आरोपींना अटक करण्यात आली. एकुण पाच आरोपींना पोलिसांनी गुरुवारी (२० नोव्हेंबर २०२५) हत्यास्थळी नेऊन त्यांची धिंड काढली. पोलिसांनी केलेल्या या कडक कारवाईमुळे गुन्हेगारांचा माज उतरवण्यात आला असून, सामान्य नागरिकांकडून याबद्दल कौतुक होत आहे. pune crime
सोमवार, १७ नोव्हेंबर रोजी सिंहगड कॉलेजजवळील मिनाक्षीपुरम परिसरातील कृष्णकुंज इमारतीच्या पार्किंगमध्ये तौफिर शेख नावाच्या रेकॉर्डवरील गुन्हेगाराची हत्या झाली होती. दुपारच्या वेळी पाच जणांच्या टोळक्याने पार्किंगमध्ये एकट्या असलेल्या तौफिरवर कोयत्याने जोरदार हल्ला केला. रक्ताच्या थारोळ्यात पडल्यानंतरही हल्लेखोर थांबले नाहीत आणि त्यांनी मोठा दगड उचलून तौफिरच्या डोक्यावर मारला, ज्यामुळे त्याचा जागीच मृत्यू झाला. या घटनेमुळे परिसरात भीतीचे वातावरण पसरले होते. पूर्ववैमनस्य किंवा टोळीयुद्धातून ही हत्या झाल्याचा संशय व्यक्त करण्यात आला होता.
पोलीसांची मोठी कारवाई
सिंहगड रस्ता पोलिसांनी या घटनेची गंभीर दखल घेत आरोपींचा शोध घेण्यासाठी तातडीने पथके नेमली. पोलिसांनी केलेल्या तत्पर कारवाईमुळे तीन दिवसांत पाचही आरोपींना अटक करण्यात यश आले. यात काही अल्पवयीन आरोपींचा समावेश आहे. अटक केल्यानंतर पोलिसांनी पाचही आरोपींना त्याच मिनाक्षीपुरम पार्किंगमध्ये नेले, जिथे त्यांनी गुन्हा केला होता.
गुन्हा कसा केला, याची माहिती घेतल्यानंतर पोलिसांनी या आरोपींची संपूर्ण परिसरात धिंड काढली. इतकेच नाही तर, आरोपींना घटनास्थळी गुडघ्यावर चालायला लावून त्यांचा माज उतरवला.
कारवाईचा व्हिडिओ समोर
ज्या ठिकाणी आरोपींनी कायदा हातात घेऊन हत्या केली, त्याच ठिकाणी पोलिसांनी त्यांना कठोर शिक्षा दिल्याने यापुढे तरी गुन्हेगारीवर नियंत्रण येईल, अशी आशा पुणेकर नागरिक बाळगत आहेत.
