Pune Bribe पुणे, ता. २ : पुणे शहरात मोठ्या लाच प्रकरणाने खळबळ उडाली असून महिला पोलीस अधिकाऱ्याला तब्बल २८ लाखांची लाच स्वीकारताना लाचलुचपत प्रतिबंधक विभागाने रंगेहात पकडले आहे. या कारवाईमुळे पोलिस दलातच धक्कादायक परिस्थिती निर्माण झाली आहे. Pune Bribe
लोहगाव पोलीस ठाण्यात कार्यरत असलेल्या सहायक पोलीस निरीक्षक वैशाली तोटेवार यांच्याविरोधात ही कारवाई करण्यात आली. त्या पुणे शहर पोलीस दलाच्या आर्थिक गुन्हे शाखेशी संबंधित कामकाज पाहत होत्या. मिळालेल्या माहितीनुसार, तोटेवार यांनी खासगी व्यक्तीच्या माध्यमातून कोंडऱ्या हॉटेल परिसरात २८ लाख रुपयांची लाच स्वीकारली. यावेळी एसीबीच्या पथकाने सापळा रचून तोटेवार यांना आणि संबंधित मध्यस्थ व्यक्तीलाही ताब्यात घेतले. Pune Bribe
या प्रकरणातील सर्वात गंभीर बाब म्हणजे, तोटेवार यांची नुकतीच लोहमार्ग मुंबई येथे बदली झाली होती आणि त्यांना कार्यमुक्तही करण्यात आले होते. त्यानंतरही त्यांनी लाच स्वीकारल्याचे समोर आल्याने प्रकरण अधिकच गडद झाले आहे.
दरम्यान, ही लाच नेमकी कोणासाठी आणि कोणत्या प्रकरणात घेतली होती, याबाबत तपास सुरू असून एसीबीकडून सखोल चौकशी केली जात आहे. या घटनेमुळे पुणे पोलिसांच्या प्रतिमेला मोठा धक्का बसला असून पुढील कारवाईकडे सर्वांचे लक्ष लागले आहे. Pune Bribe
