पुणे, : पोलीस दलात भरती झाल्याचे खोटे सांगून सोसायटीत पेढे वाटणाऱ्या आणि स्वतःच्या अभिनंदनाचे फलक (फ्लेक्स) लावणाऱ्या एका तरुणाचा बनाव नऱ्हे पोलिसांनी उघडकीस आणला आहे. पोलीस कर्मचारी जेव्हा या ‘नूतन’ सहकाऱ्याचे अभिनंदन करायला गेले, तेव्हा तो पोलीस नसून एक भाजी विक्रेता असल्याचे समोर आले. याप्रप्रकरणी पोलिसांनी संबंधित तरुणावर गुन्हा दाखल केला आहे.
ऋषीकेश राजू जाधव (वय -26, रा. तिडके डेअरीजवळ, नऱ्हे) असे गुन्हा दाखल झालेल्या तरुणाचे नाव आहे. ऋषीकेशला पोलीस दलात भरती होण्याची प्रचंड ओढ होती, मात्र उंची कमी असल्याने त्याचे हे स्वप्न पूर्ण होऊ शकले नाही. घरच्यांनी त्याला लग्नाचा विचार करून भाजीपाला विक्रीच्या व्यवसायावर लक्ष केंद्रित करण्यास सांगितले होते. मात्र, समाजात आपला प्रभाव पाडण्यासाठी त्याने आपण पोलीस झाल्याची खोटी माहिती पसरवली.
ऋषीकेशने काही दिवसांपूर्वी आपल्या कुटुंबीयांना आपली पोलीस दलात निवड झाल्याचे सांगितले. एवढ्यावरच न थांबता त्याने स्वतःचे पोलीस गणवेशातील छायाचित्र आणि पोलीस दलाचे बोधचिन्ह वापरून चौकात अभिनंदनाचे मोठे फलक लावले. सोसायटीमध्ये त्याने मोठ्या उत्साहात पेढे वाटून सर्वांचे तोंड गोड केले. इतकेच नव्हे तर, सोशल मीडियावरही त्याने पोलीस वर्दीतील फोटो ठेवून आपण ‘खाकी’त आल्याचा आभास निर्माण केला.
आपल्या हद्दीतील एक तरुण पोलीस दलात भरती झाल्याची माहिती नऱ्हे पोलीस चौकीतील कर्मचाऱ्यांना मिळाली. आपल्या नवीन सहकाऱ्याचे कौतुक करण्यासाठी आणि त्याचे अभिनंदन करण्यासाठी पोलीस कर्मचारी त्याच्या घरी पोहोचले. मात्र, तिथे गेल्यावर आणि चौकशी केल्यावर पोलिसांना संशय आला. सखोल विचारपूस केली असता, ऋषीकेशने केवळ मिरवण्यासाठी हा सर्व बनाव रचल्याचे कबूल केले.
दरम्यान, पोलीस दलाच्या बोधचिन्हाचा गैरवापर करणे आणि तोतयागिरी करून समाजाची दिशाभूल केल्याप्रकरणी ऋषीकेश जाधव विरुद्ध नऱ्हे पोलीस ठाण्यात गुन्हा दाखल करण्यात आला आहे. “उंची कमी असल्याने भरती होऊ शकलो नाही, म्हणून हे कृत्य केले,” अशी कबुली त्याने दिली आहे.
