पुणे : पीएमपी बस आणि दुचाकीची समोरासमोर धडक होऊन दोन तरुणांचा जागीच मृत्यू झाल्याची घटना सिंहगड रस्त्यावरील गोऱ्हे बुद्रुक हद्दीत ॲक्वेरिअस हॉटेलच्या समोर घडली आहे. शनिवारी (ता. २८) रात्री साडेदहा वाजण्याच्या सुमारास हा अपघात झाला आहे.
आदित्य राजेंद्र देशमुख (वय – २२, रा. तनीष सृष्टी, आळंदी देवाची) आणि निलेश मल्लेश मित्रे (वय – २२, रा. ताडीवाला रोड, पुणे) अशी या अपघातात मृत्यू झालेल्या तरुणांची नावे आहेत.
मिळालेल्या माहितीनुसार, पीएमपी बस ही स्वारगेट वरुन खानापूरकडे जात होती. तर दोन तरुण दुचाकीवरून डोणजे बाजूकडून पुण्याच्या दिशेने येत होते. गोऱ्हे बुद्रुक गावच्या हद्दीत खडकवासला धरणाला लागून असलेल्या ॲक्वेरिअस हॉटेलच्या समोर बस व दुचाकीची समोरासमोर जोरदार धडक झाली.
या अपघातात दोन्ही तरुण अत्यवस्थ होऊन पडले होते. त्यांना तातडीने उपचारांसाठी खाजगी दवाखान्यात दाखल करण्यात आले होते परंतु उपचारांपुर्वीच त्यांचा मृत्यू झाल्याचे डॉक्टरांनी सांगितले.
दरम्यान, अपघाताची माहिती मिळताच हवेली पोलीस ठाण्याचे पोलीस कर्मचारी घटनास्थळी दाखल झाले होते. दोन्ही तरुणांचे मृतदेह खाजगी रुग्णालयातून उत्तरीय तपासणीसाठी ससून रुग्णालयात पाठविण्यात आले आहेत.
पोलीस निरीक्षक सदाशिव शेलार यांच्या मार्गदर्शनाखाली सहाय्यक पोलीस फौजदार सतीश कदम याबाबत अधिक तपास करत आहेत.
