(Pimpri Accident) पिंपरी : भरधाव वेगाने दुचाकीवरून जाताना रस्त्यावर आलेल्या महिलेला वाचविण्याच्या प्रयत्नात दुचाकी बीआरटीच्या ग्रिलला धडकली. या धडकेत दुचाकीस्वाराचा मृत्यू झाल्याची धक्कादायक घटना घडली. कोकणे चौकातून नाशिककडे हा दुचाकीस्वार निघाला होता.
विशाल संजय चव्हाण (वय २४, रा. गणेशनगर, दुर्गा कॉलनी, वाकड) असे मृत्यू झालेलेल्या दुचाकी चालकाचे नाव आहे. याप्रकरणी रविवारी (दि. ९) सांगवी पोलिस ठाण्यात पोलिस हवालदार सुनील शहाजी जाधव यांनी फिर्याद दिली. ही घटना २४ मार्चला सायंकाळी सहाच्या सुमारास काटे पाटील बस स्टॉपजवळ कोकणे चौक ते नाशिकफाटा बीआरटी मार्गात घडली.
पोलिसांनी दिलेल्या माहितीनुसार…!
बीआरटी मार्गातून दुचाकीला बंदी असतानाही विशाल याने वाहतूक नियमांकडे दुर्लक्ष करत वेगाने दुचाकी नेली. महिला रस्त्यावर आली असता, तिला वाचविण्याच्या प्रयत्नात विशाल याची दुचाकी बीआरटी मार्गाच्या कडेला असलेल्या ग्रिलला धडकली. यात गंभीर जखमी होऊन स्वत:च्या मृत्यूला कारणीभूत ठरला, असे फिर्यादीत नमूद आहे.
