पुणे : स्पा मसाज सेंटरच्या नावाखाली वेश्याव्यावसाय सुरु असलेल्या पिंपळे सौदागर येथील ‘एज लाइन टच द ब्यूटी’ ‘स्पा’ सेंटरवर अनैतिक मानवी वाहतूक प्रतिबंधक विभागाने छापा मारून मिझोराम राज्यातील एक आणि महाराष्ट्रातील चार अशा ५ तरुणींची वेश्याव्यवसायातून सुटका केली आहे. तसेच स्पाचा व्यवस्थापकासहित तिघांवर गुन्हा दाखल करण्यात आला आहे.
व्यवस्थापक शाकीर समीरुद्दीन अहमद (वय २६, रा. पिंपळे-सौदागर, मूळचा आसाम) याला पोलिसांनी अटक केली आहे. पांडे चंकी धर्मेंद्र (वय – २२, रा. काळेवाडी), मंगेश भगवान जाधव (वय-३५, रा. हिंजवडी) यांच्या विरोधात गुन्हा दाखल करण्यात आला आहे.
त्यांच्याकडून रोख रक्कम, मोबाइल, पेटीएम स्कॅनर आणि इतर साहित्य असा ११ हजार ३० रुपयांचा मुद्देमाल जप्त करण्यात आला. या प्रकरणी महिला पोलिस हवालदार सुधा टोके यांनी सांगवी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी शाकीर हा पिंपळे – सौदागर परिसरातील काटेवस्ती येथे स्पा सेंटर चालवत होता. त्याने काही तरुणींना पैशांचे आमिष दाखवून या स्पा सेंटरमध्ये वेश्या व्यवसायासाठी त्यांना प्रवृत्त केल्याची माहिती एका खबऱ्याकडून अनैतिक मानवी वाहतूक प्रतिबंधक विभागाला मिळाली होती.
दरम्यान, पोलिसांनी स्पा सेंटरवर बनावट गिऱ्हाईक पाठवून माहितीची खातरजमा केली. त्यामध्ये स्पा सेंटरमध्ये वेश्याव्यवसाय सुरू असल्याची खात्री झाली. पोलिसांनी छापा मारून पाच तरुणींची सुटका केली.
स्पा सेंटरजवळ दोन रुग्णालये आणि एक शाळा आहे. रुग्णालये आणि शाळांच्या बाजूला हा प्रकार सुरू असल्याचे फिर्यादीत नमूद करण्यात आले आहे. या कारवाईत रोख रक्कम, मोबाइल, पेटीएम स्कॅनर आणि इतर साहित्य असा ११ हजार ३० रुपयांचा मुद्देमाल जप्त करण्यात आला.
