Pimpari News : पिंपरी, (पुणे) : पिंपरी चिंचवड शहरातील चिखली घरकुल परिसरात दोन व्यक्तींनी दारूच्या नशेत नवीन चारचाकी वाहनांची तोडफोड केल्याची घटना घडली आहे. या घटनेने चिखली घरकुल परिसरात खळबळ उडाली असून गाड्यांचे मोठ्या प्रमाणावर नुकसान झाले आहे. याप्रकरणी पोलिसांनी दोघांना अटक केली आहे. Pimpari News
पोलिसांनी दिलेल्या माहितीनुसार, पिंपरी चिंचवड परिसरातील चिखली घरकुल आणि शरद नगर परिसरात बुधवारी सायंकाळी साडेचार वाजण्याच्या सुमारास दोन व्यक्ती मद्यधुंद अवस्थेत आल्या. त्यांनी हातात कोयते घेऊन येथील चारचाकींसह आठ ते दहा वाहनांची नाहक तोडफोड केली. वाहने फोडल्यानंतर त्यांनी दहशत निर्माण करण्याचा प्रयत्न केला. या घटनेचे सीसीटीव्ही फुटेज समोर आल्यानंतर पोलिसांनी तत्काळ घटनेची दखल घेत या दोघांना अटक केली आहे.
भरदिवसा अशा प्रकारची घटना घडल्याने परिसरात एकच खळबळ उडाली होती. या घटनेत वाहनांचे मोठया प्रमाणावर नुकसान झाले असून नागरिकांमध्ये भीतीचे वातावरण पसरले आहे. ही सर्व घटना सीसीटिव्ही मध्ये कैद झाली असून आरोपींना पोलिसांनी ताब्यात घेतले आहे. (Pimpari News)
दरम्यान, पुणे शहरात सलग दोन ते तीन दिवस वाहने फोडीच्या घटना घडल्या होत्या. त्यामध्ये देखील नागरिकांच्या गाड्यांचे मोठे नुकसान झाले होते. आता पिंपरी चिंचवड शहरात हा प्रकार घडल्याने कोयता गँग आता पुन्हा सक्रिय होते की काय अशी परिस्थिती आता निर्माण होऊ लागली आहे. या घटनेतील आरोपींना शिक्षा व्हावी अशी मागणी परिसरातील नागरिकांनी केली आहे. (Pimpari News)
