पुणे : सिलिंडरच्या रेग्युलेटरमधून गॅसगळती होऊन झालेल्या गॅसच्या भडक्यात चार जण गंभीर जखमी झाल्याची घटना वडगाव मावळ (ता. मावळ) परिसरात घडली आहे. सोमवारी (ता. २७) रात्री साडेअकरा वाजण्याच्या सुमारास हॉटेल ओरिटेल जवळील ढोरे चाळीत घडली आहे.
बबन बिरादार, संदीप राऊत, मनोहर पाटील, भरत पडवळ अशी या दुर्घटनेत जखमी झालेल्यांची नावे आहेत.
पोलिसांनी दिलेल्या माहितीनुसार, बबन बिरादार, संदीप राऊत, मनोहर पाटील, भरत पडवळ हे चौघेजण भाड्याने घेतलेल्या खोलीत राहात आहेत. सोमवारी रात्री सिलिंडरच्या रेग्युलेटरमधून गॅसगळती होऊन भडका उडाला. त्यात चौघे जण होरपळून गंभीर जखमी झाले. आजूबाजूच्या रहिवाशांनी शेजारील आरएमसी प्लॅन्टमधून पाणी टँकर आणून आग विझवली व जखमींना स्थानिक रुग्णालयात दाखल केले.
दरम्यान, प्राथमिक उपचारानंतर त्यांना पुण्यातील ससून रुग्णालयात हलविण्यात आले. पोलीस निरीक्षक विलास भोसले यांच्या मार्गदर्शनाखाली पोलीस हवालदार विशाल जांभळे पुढील तपास करत आहेत.
