दीपक खिलारे
इंदापूर : खोरोची (ता. इंदापूर) येथील दरोड्याचा स्थानिक गुन्हे अन्वेषण विभागाने ७२ तासांत छडा लावून तीन जणांना ताब्यात घेतले आहे. दि. १३ डिसेंबर रोजी पहाटे मौजे खोरोची, ता. इंदापूर, जि. पुणे गावचे हद्दीत दयाराम नारायण कणीचे (वय ७० वर्षे) त्यांची पत्नी जनाबाई दयाराम कणीचे (वय ६५ वर्ष) हे वयोवृध्द जोडपे त्यांचे राहत्या घरासमोर झोपलेले असताना अनोळखी इसमांनी लोखंडी रॉड व काठीने मारहाण करून त्यांना जबर जखमी केले होते. तसेच दरवाजाचे कुलूप तोडून घरात प्रवेश करुन घरातील मौल्यवान वस्तू चोरुन नेल्या होत्या.
याप्रकरणी इंदापूर पोलीस ठाण्यात भा.दं.वि.कलम ३९७,४५७,३८० प्रमाणे गुन्हा दाखल करण्यात आला होता.
दरम्यान हल्ल्यातील जखमी दयाराम नारायण कणीचे यांचा उपचारादरम्यान मृत्यु झाला होता.
सदरच्या गुन्ह्याचे स्वरुप लक्षात घेता पोलीस अधीक्षक अंकित गोयल यांनी अप्पर पोलीस अधीक्षक आनंदराव भोईटे, उप विभागीय पोलीस अधिकारी गणेश इंगळे यांचे मार्गदर्शनाखाली स्थानिक गुन्हे शाखा, पुणे ग्रामीण येथील पोलीस निरीक्षक अविनाश शिळीमकर व इंदापूर पोलीस ठाण्याचे पोलीस निरीक्षक प्रदिप सुर्यवंशी यांचे नेतृत्वाखाली सहा पोलीस निरीक्षक सचिन काळे, पो. स. ई. अमित सिद पाटील, पो. स. ई. शिवाजी ननवरे, सहा फौज. बाळासाहेब कारंडे, सहा फौज. रविराज कोकरे, पो.हवा. सचिन घाडगे, पो.हवा.अभिजीत एकशिंगे, हवा. स्वप्निल अहिवळे, हवा. विजय कांचन, पो. हवा. एम. आय. मोमीन, हवा. अजित भुजबळ, पो. हवा. आसिफ शेख, पो. हवा. योगेश नागरगोजे, पो. हवा. चंद्रकांत जाधव, पो. हवा अजय घुले, पो. कॉ. धीरज जाधव, पो. कॉ. दगडू विरकर, चा. सहा फौज काशीनाथ राजापुरे, चा. पो. कॉ. अक्षय सुपे, तसेच इंदापूर पो. स्टेशनचे सहा. पोलीस निरीक्षक नागनाथ पाटील, पो हवा. नानासाहेब आटोळे, पो. ना. सलमान खान, पो. कॉ. विशाल चौधर व सहा.फौज. शिवाजी निकम, वालचंदनगर पो.स्टे. अशी चार पथके नेमून तपास सुरू केला होता.
या तपास पथकाने तपासाअंती तुषार दादासो चव्हाण (वय २२ वर्षे, व्यवसाय मजुरी, राहणार फोंडशीरस, पाटील वस्ती, ता. माळशीरस, जि.सोलापूर) या प्रमुख आरोपीसह त्याचे साथीदार रोहन उर्फ सोन्या शिवाजी जाधव ( वय १९ वर्षे, रा. खोरोची, हनुमान चौक, ता. इंदापूर, जि. पुणे) आणि नितीन बजरंग जाधव ( वय २७ वर्षे, रा. खोरोची खंडोबा मंदिराच्या पाठीमागे, ता. इंदापूर, जि. पुणे) यांना ताब्यात घेतले.
सदर गुन्ह्याचा अधिक तपास सहाय्यक पोलीस निरीक्षक नागनाथ हे पाटील करीत आहेत.
