लोणी काळभोर, (पुणे) : कोयत्याचा धाक दाखवून व लाथाबुक्क्यांनी मारहाण करून मंडप व्यापाऱ्याला लुटणाऱ्या टोळीतील दोन आरोपींना कोतवाली पोलिसांनी जेरबंद केले आहे.
संकेत बाळासाहेब तारडे (वय २३, रा. बुरुडगांव, अहमदनगर), विजय बबन नवथरे (वय २०, रा. मुरुडगाव, अहमदनगर) अशी अटक केलेल्या आरोपींची नावे आहेत. या गुन्ह्यातील तिसरा आरोपी अभिषेक विजय मोढवे (रा. अंबिका चौक, वाकोडी फाटा, सोलापुर रोड, अहमदनगर) याला यापूर्वीच कोतवाली पोलिसांनी अटक केली आहे.
कोतवाली पोलिसांनी दिलेल्या माहितीनुसार, बुरुडगाव रस्त्यावरील नक्षत्र लॉन येथे १९ ऑगस्टला रात्री मालवाहू टेम्पो घेऊन जाणाऱ्या दोघांना चार जणांच्या टोळीने कोयत्याचा धाक दाखवून मारहाण करून लुटल्याची घटना घडली होती. यावेळी ११ हजारांची रोख रक्कम चोरून नेली होती. याप्रकरणी कोतवाली पोलीस ठाण्यात गुन्हा दाखल करण्यात आला होता.
गुन्हा घडल्यानंतर तात्काळ एका आरोपीला कोतवाली पोलिसांनी अटक केली होती. तसेच इतर दोन आरोपी वाडिया पार्क परिसरात येणार असल्याची माहिती पोलीस निरीक्षक चंद्रशेखर यादव यांनी दोघांना सापळा लावून अटक केली. आरोपींना न्यायालयासमोर हजर केले असता त्यांना तीन दिवसांची पोलीस कोठडी सुनावली आहे.
दरम्यान, पोलीस निरीक्षक चंद्रशेखर यादव, उपनिरीक्षक अश्विनी मोरे, पोलीस हवालदार तनवीर शेख, गणेश धोत्रे, योगेश भिंगारदिवे, संदिप पितळे, संदिप थोरात, अमोल गाडे, कैलास शिरसाठ, सोमनाथ राऊत, सुजय हिवाळे यांनी ही कारवाई केली आहे.
