Mumbai-Pune Exprsss Highway पुणे : मुंबई-पुणे एक्स्प्रेस वेवर खोपोली एक्झिटजवळ ११ वाहने एकमेकांवर आदळल्याची घटना घडली असून यामध्ये कोणतीही जीवितहानी झाली नसली तरी अनेकजण गंभीर जखमी झाले आहेत. या अपघातात गाड्यांचे मोठ्या प्रमाणात नुकसान झाले आहे.
मिळालेल्या माहितीनुसार, पोलिसांनी तातडीने घटनास्थळी धाव घेत मदतकार्य सुरु केले. तसेच स्थानिक नागरिक देखील वाहतूक कोंडी दूर करण्यासाठी मोठ्या पद्धतीने सहकार्य करत आहेत.
मुंबई पुणे एक्स्प्रेस वे वर नेहमीच वाहनांची वर्दळ असते. या मार्गावर नेहमीच छोटे मोठे अपघात होत असतात. मात्र आजचा हा अपघात भयानक होता. सर्वात पुढच्या वाहन चालकाने अचानक ब्रेक लावल्यामुळे हा भीषण अपघात झालेला आहे.
जखमी व्यक्तींना जवळच्या हॉस्पिटलमध्ये दाखल…!
गाड्यांचे मोठ्या प्रमाणात नुकसान झाले असून अनेक प्रवासी जखमी झाले आहेत. जखमी व्यक्तींना जवळच्या हॉस्पिटलमध्ये दाखल करण्यात आले आहे. तर अपघातामुळे वाहतूक काही काळासाठी ठप्प झाली होती.
दरम्यान, या घटनेचा एक व्हिडिओही समोर आला आहे. यात अनेक गाड्या एकमेकांवर आदळल्याचे दिसत आहे. यात ट्रकही कारला धडकल्याचे दिसत आहे.
NHAI टीम व्यतिरिक्त पोलीसही घटनास्थळी पोहोचले आहेत. एक्स्प्रेस वेवर जाम होऊ नये म्हणून हळूहळू वाहने हटवली जात आहेत. त्याचबरोबर अपघातग्रस्त वाहने मुख्य रस्त्यावरून हटविण्याचे कामही करण्यात येत आहे.
