(Mediclaim Insurance) बडोदा : मेडिकल इन्शुरन्स क्लेम अर्थात वैद्यकीय विम्याचा दावा करण्यासाठी आता रुग्णालयात २४ तास दाखल होणे आवश्यक नाही. आता काळ बदलला आहे. त्यामुळे ग्राहकाला विमा कंपनीने भरपाई देण्यात यावी. असे आदेश वडोदराच्या ग्राहक मंच न्यायालयाने दिले आहे.
बडोदा येथील रमेशचंद्र जोशी नॅशनल इन्शुरन्स कंपनीविरोधात तक्रार दाखल केली होती. त्या अनुषंगाने वडोदराच्या ग्राहक मंच न्यायालयाने वरील आदेश दिले आहे.
मिळालेल्या माहितीनुसार, रमेशचंद्र जोशी यांच्या पत्नीला २०१६ मध्ये डर्माटोमायोसायटिसचा त्रास झाला झाल्याने त्यांना अहमदाबाद येथील लाइफकेअर इन्स्टिट्यूट ऑफ मेडिकल सायन्स अँड रिसर्च सेंटरमध्ये दाखल केले होते. उपचारानंतर दुसऱ्या दिवशी त्यांना डिस्चार्ज देण्यात आला.
त्यानंतर जोशी यांनी यासाठी २०१७ मध्ये नॅशनल इन्शुरन्स विमा कंपनीकडे ४४,४६८ रुपयांचा क्लेम केला. नियमानुसार रुग्णाला २४ तासांपर्यंत दाखल करण्यात आले नसल्याचा युक्तिवाद करून कंपनीने क्लेम नाकारला होता. याप्रकरणी जोशी यांनी नॅशनल इन्शुरन्स कंपनीच्या विरोधात वडोदराच्या ग्राहक मंच न्यायालयाकडे तक्रार दाखल केली होती.
सदर तक्रारीचा खटला वडोदराच्या ग्राहक मंच न्यायालयात सुरु होता. तेव्हा न्यायालयाने विमा कंपनीला सांगितले की, रुग्णाला रुग्णालयात दाखल करणे आवश्यक आहे की नाही, हे विमा कंपनी ठरवू शकत नाही. रुग्णाची स्थिती लक्षात घेऊन केवळ डॉक्टरच निर्णय घेऊ शकतात.
दरम्यान, फोरमने विमा कंपनीला क्लेम नाकारल्याच्या तारखेपासून ९ टक्के व्याजासह ४४,४६८ रूपये जोशी यांना देण्याचे आदेश दिले. तसेच मानसिक त्रासापोटी ३ हजार रूपये आणि खटल्याच्या खर्चासाठी २ हजार रूपये जोशी यांना देण्याचे आदेशही न्यायालयाने दिले आहेत.
