Loni Kalbhor News : लोणी काळभोर, (पुणे) : परिसरात गेल्या काही दिवसांत घडत असलेल्या घटनांवरून गुन्हेगारी प्रवृत्तीत वाढ होत असल्याचे धक्कादायक वास्तव समोर येत आहे. कदमवाकवस्ती येथील एमआयटी कॉर्नरजवळ दोन गटांत किरकोळ कारणावरून बुधवारी (ता. २६) दुपारी सव्वा एक वाजण्याच्या सुमारास फ्री स्टाईल हाणामारी झाल्याची घटना घडली होती. ही घटना ताजी असतानाच, गाडीला कट मारल्याच्या रागातून ट्रक चालकाला बेदम मारहाण केल्याची घटना आज दुपारी दीड वाजण्याच्या सुमारास कदमवाकवस्ती (ता. हवेली) ग्रामपंचायत हद्दीतील लोणी स्टेशन चौकात घडली आहे. Loni Kalbhor News
या घटनेबाबत मिळालेल्या माहितीनुसार, ट्रकचालक व कारचालक हे दोघेही पुणे-सोलापूर महामार्गावरून पुण्याच्या दिशेने निघाले होते. दरम्यान, दोन्ही चालकांमध्ये गाडी ओव्हरटेक करण्यावरून चढाओढ सुरू होती. या चढाओढीतूनच गाड्यांचा एकमेकांना कट लागला. या प्रकारामुळे संतप्त झालेल्या कारचालकाने पुणे-सोलापूर रस्त्यावर ट्रकला गाडी आडवी लावली. Loni Kalbhor News
या दरम्यान, दोघांमध्ये बाचाबाची झाली. कारमधील दोघांनी खाली उतरून ट्रकचालकाला बेदम मारहाण करून, शिवीगाळ केली. भर रस्त्यावरच हा प्रकार सुरू असल्याने वाहतूकीचा खोळंबा झाला. महामार्गावर वाहनांच्या लांबच लांब रांगा लागल्या. तसेच बघ्यांनी मोठी गर्दी केली होती.
या घटनेची माहिती मिळताच लोणी काळभोर पोलीस तातडीने घटनास्थळी दाखल झाले. या घटनेची अधिक तपासणी पोलीस करत आहेत. दरम्यान, लोणी काळभोर पोलीस ठाण्याच्या हद्दीत गुन्हेगारी वाढत आहे. पोलिसांचा गुन्हेगार व गुन्हेगारीवर वचक राहिला नसल्याच्या संतापजनक प्रतिक्रिया स्थानिकांनी व्यक्त केल्या आहेत. Loni Kalbhor News
