लोणी काळभोर, (पुणे) : पुणे – सोलापूर महामार्गावर कदमवाकवस्ती (ता. हवेली) ग्रामपंचायत हद्दीतील एच. पी. गेट नंबर ३ येथे महामार्गावर उभ्या असलेल्या ट्रकला सोलपुरच्या बाजूकडे जाणाऱ्या पिकअपने दिलेल्या जोरदार धडकेत पिकअप चालकाचा जागेवरच मृत्यू झाला आहे. तर शेजारी बसलेला त्याचा साथीदार जखमी झाल्याची घटना रविवारी (ता. ०५) पहाटे सव्वा चार वाजण्याच्या सुमरास घडली आहे.
महादेव वामन जोगदंड (वय-२७, रा. वडगाव, ता. निलंगा, जि. लातूर) असे अपघातात मृत्यू झालेल्या चालकाचे नाव आहे. तर देविदास नामदेव वाघमारे (वय-२८, रा. सहजपूर, ता. दौंड) असे जखमी झालेल्या तरुणाचे नाव आहे.
मिळालेल्या माहितीनुसार, पुणे – सोलापूर महामार्गावरून महादेव जोगदंड व देविदास वाघमारे हे पुण्यातील हॉटेलमध्ये शिल्लक राहिलेले अन्न हे पिकअप मधून सहजपूर (ता. दौंड) या ठिकाणी घेऊन जात होते. पहाटे चार वाजण्याच्या सुमारास कदमवाकवस्ती ग्रामपंचायत हद्दीत एच.पी. गेट नंबर तीन च्या समोर आले असता, महादेव जोगदंड यांचे पिकअपवरील नियंत्रण सुटले व महामार्गावर उभ्या असलेल्या ट्रकला पाठीमागून जोरदार धडक दिली.
हा अपघात एवढा भीषण होता कि, पिकअप चालकाच्या बाजूची एक साईड पूर्णपणे चक्काचूर झाली होती. यामध्येच महादेव जोगदंड यांचा जागेवरच मृत्यू झाला. तर शेजारी बसलेले देविदास वाघमारे हे जखमी झाले असून त्यांच्यावर एका खाजगी रुग्णालयात उपचार सुरु आहेत.
दरम्यान, सदर घटनेची माहिती लोणी काळभोर पोलिसांना मिळताच पोलीस तात्काळ घटनास्थळी दाखल झाले होते. वाहतूक कोंडी सुरळीत करून जखमींना रुग्णालयात दाखल केले आहे. पुढील तपास पोलीस उपनिरीक्षक हनुमंत तरटे करीत आहेत.
