Leopard Attack : न्हावरे, (पुणे) : शिरूर तालुक्यातील इनामगाव येथे घराच्या पडवीत झोपलेल्या एका वृद्ध महिलेवर बिबट्याने हल्ला केल्याची धक्कादायक घटना शुक्रवारी (ता. 29) पहाटे घडली. नातवाने आरडाओरडा केल्याने बिबट्याने तेथून पलायन केले आणि मोठा अनर्थ टळला. या घटनेमुळे परिसरात भीतीचे वातावरण निर्माण झाले असून नागरिकांनी वनविभागाकडे तातडीने उपाययोजना करण्याची मागणी केली आहे. Leopard Attack
मिळालेल्या माहितीनुसार, इनामगाव (ता. शिरूर) येथील नलगे मळा परिसरात राहणाऱ्या पुष्पा रंगनाथ नलगे (वय-65) या गुरुवारी रात्री उकाडा वाढल्याने घराच्या पडवीत सून व नातवासह झोपल्या होत्या. परिसरात वारंवार वीजपुरवठा खंडित होत असल्याने घरात असह्य उकाडा निर्माण झाला होता. दरम्यान, शुक्रवारी पहाटे सुमारे तीन वाजण्याच्या सुमारास दबा धरून बसलेल्या बिबट्याने अचानक वृद्ध महिलेवर हल्ला केला. Leopard Attack
हल्ल्यानंतर पुष्पा नलगे यांनी आरडाओरडा सुरू केल्याने त्यांचा नातू जागा झाला. समोर बिबट्या दिसताच त्याने मोठ्याने आरडा ओरडा केला. त्यामुळे घाबरलेल्या बिबट्याने तेथून धूम ठोकली. नातवाच्या प्रसंगावधानामुळे वृद्ध महिलेचे प्राण वाचले असल्याची भावना ग्रामस्थांनी व्यक्त केली आहे. या हल्ल्यात पुष्पा नलगे या किरकोळ जखमी झाल्या असून त्यांच्यावर मांडवगण फराटा येथील प्राथमिक आरोग्य केंद्रात उपचार करण्यात आले आहेत. Leopard Attack
दरम्यान, नलगे मळा परिसरात यापूर्वीही अनेक बिबटे जेरबंद करण्यात आले आहेत. मात्र, तरीदेखील बिबट्यांचा वावर कमी झालेला नसल्याने ग्रामस्थांमध्ये भीतीचे वातावरण कायम आहे. विशेषतः रात्रीच्या वेळी वारंवार वीजपुरवठा खंडित होत असल्याने नागरिकांना जीव मुठीत धरून राहावे लागत आहे. त्यामुळे या भागात अखंडित वीजपुरवठा करण्यासह वनविभागाने तातडीने पिंजरे लावून बिबट्यांचा बंदोबस्त करावा, अशी मागणी नागरिकांकडून करण्यात येत आहे. Leopard Attack
