पुणे : कोरेगाव पार्क आणि लोहगाव गोळीबार प्रकरणातील ८ आरोपींना पुणे शहर पोलिसांनी अटक केली आहे.
कोरेगाव पार्क गोळीबार प्रकरणातील आरोपी नितीन उर्फ नट्टा मोहन म्हस्के (वय ३२), संतोष सिद्धार्थ चव्हाण (वय २७, दोघे रा. ताडीवाला रोड) या दोघांना गुन्हे शाखेच्या युनिट दोनच्या पथकाने तर बंडगार्डन पोलिसांच्या पथकाकडून मुख्य आरोपी अजय उर्फ सोन्या दोडमणी, अजय काळुराम साळुंखे उर्फ धार यांना अटक करण्यात आली आहे.
पोलिसांनी दिलेल्या माहितीनुसार, आरोपी म्हस्के आणि त्याच्या साथीदारांनी सराईत गुंड यल्लापा कोळनट्टी याच्यावर गोळीबार करुन तीक्ष्ण शस्त्राने वार केले होते. हि घटना कोरेगाव पार्क भागातील योगी पार्क सोसायटी परिसरात गुरूवारी रात्री घडली होती.
हि कामगिरी बंडगार्डन पोलीस ठाण्याचे वरिष्ठ पोलीस निरीक्षक प्रताप मानकर, गुन्हे शाखेचे पोलीस निरीक्षक संदीप भोसले यांच्या मार्गदर्शनाखाली पोलीस उपनिरीक्षक नितीन कांबळे, संजय जाधव, निखील जाधव, मोहसीन शेख, कादीर शेख यांच्या पथकाने केली आहे. गुन्हे शाखा व बंडगार्डन पोलिसांनी संयुक्तरीत्या कारवाई करून आरोपींना बेड्या ठोकल्या आहेत.
लोहगाव भागात दहशत माजविण्यासाठी पिस्तुलातून हवेत गोळीबार करणाऱ्या आरोपींना विमाननगर पोलिसांनी अटक केली. नितीन किसन सकट (वय २१), गणेश सखाराम राखपसरे (वय २१), पवन युवराज पैठणकर (वय १८ तिघे रा. राखपसरे वस्ती लोहगाव), अविनाश काळुराम मदगे (वय २२,रा. खेसे वस्ती लोहगाव) अशी अटक करण्यात आलेल्या आरोपींची नावे आहेत. आरोपींकडून एक पिस्तुल जप्त करण्यात आले.
हि कामगिरी विमाननगर पोलीस ठाण्याचे वरिष्ठ पोलिस निरीक्षक विलास सोंडे, गुन्हे शाखेचे पोलीस निरीक्षक मंगेश जगताप यांच्या मार्गदर्शनाखाली उपनिरीक्षक अविनाश ढावरे कर्मचारी अविनाश शेवाळे, सचिन कदम, अंकुश जोगदंड, नाना कर्चे आणि रुपेश तोडेकर यांच्या पथकाने केली आहे.
