कोल्हापूर : सख्ख्या भावाने बहिणीची कोयत्याने हत्या केली व त्यानंतर रक्ताने माखलेला कोयता घेऊन रस्त्यावर फिरत असल्याची घटना वाघबीट (ता. पन्हाळा, जिल्हा. कोल्ह्यापुर) या ठिकाणी घडली. आरोपीला पोलिसांनी ताब्यात घेतले आहे.
मिळालेल्या माहितीनुसार, सदरचा तरुण दारूच्या नशेत रक्ताने माखलेला कोयता हातात घेऊन फिरत होता. याबाबतची माहिती पोलिसांना मिळताच तरुणाला ताब्यात घेण्यात आले. यावेळी त्याची अधिक चौकशी केली असता, त्याने आपल्या सख्ख्या बहिणीचा खून केला असल्याचे सांगितले.
दारूच्या नशेत तरुणाने बहिणीचा खून केला असावा असा प्राथमिक अंदाज पोलिसांकडून वर्तवण्यात येत आहे. पोलिसांना अद्याप मृतदेह मिळाला नाही. एका पोत्यावर गीता प्रताप असे रक्ताने लिहिलेले आढळून आले आहे. मृतदेह शोधण्याचे काम पोलिसांकडून सुरू आहे.
दरम्यान, पोलिस सध्या सदर तरुणाची कसून चौकशी करत आहेत. तसेच हा तरुण नशेत असल्याची माहिती पोलिसांनी दिली असून हत्येचे कारण अद्याप स्पष्ट झाले नाही. या घटनेमुळे मात्र परिसरात एकच खळबळ उडाली आहे.
