Kharadi News खराडी, ता. ७ : खराडी पोलिसांनी मध्यरात्री मोठी कारवाई करत जुगार अड्ड्यावर धाड टाकून पाच जणांना रंगेहात पकडले. या कारवाईत रोख रक्कम, मोबाईल फोन, चारचाकी व दुचाकी वाहने तसेच जुगाराचे साहित्य असा तब्बल ४ लाख ३० हजार ३६० रुपयांचा मुद्देमाल जप्त करण्यात आला आहे. Kharadi News
खराडी पोलीस स्टेशन हद्दीत महालक्ष्मी लॉन्स शेजारील मोकळ्या जागेत काही इसम पैसे लावून ‘१३ पानी’ जुगार खेळत असल्याची माहिती पोलिसांच्या तपास पथकाला मिळाली होती. ही माहिती वरिष्ठ पोलीस निरीक्षक संजय चव्हाण यांना देण्यात आली. त्यांच्या सूचनेनुसार सहायक पोलीस निरीक्षक रविंद्र गोडसे यांच्या नेतृत्वाखाली विशेष पथकाने तातडीने कारवाई सुरू केली. Kharadi News
मध्यरात्री साडेबारा वाजण्याच्या सुमारास पोलिसांनी महालक्ष्मी लॉन्स परिसरात सापळा रचून अचानक धाड टाकली. यावेळी जुगार खेळणारे पाच जण पोलिसांच्या हाती लागले. कारवाईदरम्यान पोलिसांनी रोख ८० हजार १४० रुपये, पाच मोबाईल फोन, एक मारुती स्विफ्ट कार, दोन मोपेड दुचाकी आणि जुगाराचे साहित्य असा मोठा मुद्देमाल जप्त केला.
या कारवाईत करीम खाजामिया मोमीन, प्रशांत श्रिकांत आव्हाळे, अब्दुल जब्बाल लष्कर, दशरथ धानोजी वाघमारे आणि जुगार अड्डा चालवणारा रुबीकेश राजाराम अंधे यांना ताब्यात घेण्यात आले. सर्व आरोपींविरोधात महाराष्ट्र जुगार प्रतिबंध अधिनियमांतर्गत गुन्हा दाखल करण्यात आला आहे. या धाडीत पोलीस उपनिरीक्षक गणेश घुले, पोलीस हवालदार महेश नाणेकर, मनोज खरपुडे तसेच विलास केदारी, अशोक केदार, सुरज जाधव आणि महेश बोराडे यांनी सहभाग घेतला. Kharadi News
दरम्यान, खराडी पोलिसांनी नागरिकांना आवाहन केले असून, परिसरात अवैध दारू, जुगार, मटका किंवा मादक पदार्थ विक्रीबाबत माहिती मिळाल्यास तातडीने पोलिसांना कळवावे, असे सांगितले आहे. भविष्यातही अशा अवैध व्यवसायांवर कठोर कारवाई सुरूच राहणार असल्याचा इशाराही पोलिसांनी दिला आहे.
सदरची कामगिरी पुणे शहर पोलीस आयुक्त अमितेशकुमार , पोलीस सह आयुक्त रंजनकुमार शर्मा, अपर पोलीस आयुक्त मनोजकुमार पाटील, पोलीस उप आयुक्त सोमय मुंडे, सहाय्यक पोलीस आयुक्त नुतन पवार यांच्या मार्गदर्शनाखाली खराडी पोलीस ठाण्याचे वरिष्ठ पोलीस निरीक्षक संजय चव्हाण,तपास पथकाचे प्रभारी अधिकारी सहायक पोलीस निरीक्षक रविंद्र गोडसे, पोलीस उप निरीक्षक गणेश घुले, पोलीस अंमलदार महेश नाणेकर, मनोज खरपुडे, सुरज जाधव, अशोक केदार, विलास केदारी, महेश बोराडे यांच्या पथकाने केली आहे.
