लोणी काळभोर, (पुणे) : उरुळी कांचन ग्रामपंचायत हद्दीत एक वर्षभरापूर्वी झालेल्या बहुचर्चित वाळू व्यावसायिक संतोष जगताप यांच्या खुनातील मुख्य साक्षीदारांना मारण्याचा कट लोणी काळभोर पोलिसांनी उधळून लावला असून, याप्रकरणी पोलिसांनी चौघांना ताब्यात घेतले आहे.
आशिष अनिल वरगडे (वय-२२ रा. आश्रमरोड, उरुळीकांचन), उध्दव राजाराम मिसाळ (वय-४५ रा. दत्तवाडी, उरुळीकांचन), सुरज सतिष जगताप रा. गणेशवाडी, वरवंड, ता. दौंड) किशोर ऊर्फ शिवा छबु साळुंके (रा. बोरीपार्थी, केडगाव, ता. दौंड) अशी अटक करण्यात आलेल्या चौघांची नावे आहेत.
वरिष्ठ पोलीस निरीक्षक दत्तात्रय चव्हाण यांनी दिलेल्या माहितीनुसार, लोणी काळभोर पोलीस ठाण्याच्या हद्दीतील उरुळी कांचन ग्रामपंचायत हद्दीत हॉटेल सोनाईच्या समोर ऑक्टोंबर २०२१ मध्ये संतोष जगताप व त्याचा अंगरक्षक यांचा खुन भर रस्त्यामध्ये गोळीबार करुन करण्यात आला होता. सदर घटनेमध्ये समोरासमोरील गोळीबारामध्ये तीघांचा जिव गेला होता. त्यानुसार आरोपींवर लोणी काळभोर पोलिस ठाण्यात गुन्हा दाखल करण्यात आला होता.
सदर गुन्हयातील अनेक साक्षीदारांपैकी महत्वाचे साक्षीदारांना संपविण्याचा कट संतोष जगताप खुन खटल्यातील मुख्य आरोपींनी शिवाजीनगर कोर्टामध्ये पेशीकरीता आल्यानंतर त्यांचे जवळचे मित्रांना (रेकॉर्डवरील गुन्हेगारांना) काही लाख रुपयांची सुपारी देऊन रचला होता. अशी माहिती पोलिसांना मिळाली होती.
माहितीच्या अनुशंघाने लोणी काळभोर पोलीस शनिवारी (ता. २८) गस्त घालीत असताना पोलीस शिपाई निखील पवार यांना एका खबऱ्याकडून मिळालेल्या खात्रीशीर माहितीनुसार व वरीष्ठांनी दिलेल्या आदेशानुसार दत्तवाडी रोड, सरकारी दवाखान्याजवळ उरुळी कांचन याठिकाणी सापळा रचुन अग्निशस्त्र (गावठी कट्टा) व तिक्ष्ण हत्यारासह दोन आरोपींना शिताफीने ताब्यात घेतले.
आरोपींचे अंगझडतीमध्ये त्यांचेकडुन एक गावठी कट्टा, दोन जिवंत काडतुस एक धारदार चाकू अशी घातक हत्यारे जप्त करणेत आली. त्यांच्याकडे अधिक चौकशी केली असता त्यांनी आणखी दोन साथीदारांची नावे सांगितली असून त्या दोघांनाही पोलिसांनी ताब्यात घेतले आहे. आरोपींना न्यायालयात दाखल केले असता न्यायालयाने ४ दिवसांची रिमांड कोठडी दिली आहे. सदर गुन्हयाचे तपासामध्ये वरिल हकिकत निष्पन्न झाली आहे. गुन्हयाचे तपासामध्ये यामध्ये आणखी काही आरोपींचा सहभाग असल्याचे निष्पन्न होत आहे.
दरम्यान, सध्या संतोष जगताप याचे खुन खटल्याची सुनावणी सुरु होत आहे. अशावेळी सदर केसमधील मुख्य साक्षीदारांच्या साक्षीवर यातील सर्व आरोपींना फाशी किंवा जन्मठेप अशी शिक्षा होण्याची दाट शक्यता आहे ही गोष्ट आरोपींना ज्ञात असल्याने त्यांनी मुख्य साक्षीदारांना संपवुन टाकण्याचा कट रचला होता. त्यांनी कोर्ट पेशीचेवेळी मोठी रक्कम देण्याचे आश्वासन देवुन अटक आरोपींना त्यांचे बाहेर असलेल्या हस्तकांमार्फत अग्निशस्त्र पुरवले असल्याची बातमी लोणीकाळभोर पोलीस ठाण्याचे वरिष्ठ पोलीस निरीक्षक दत्तात्रय चव्हाण व त्यांच्या पथकाला मिळाली होती.
कुविख्यात गुंड व वाळुमाफिया आप्पा लोंढे यांच्या खुनातील आरोपी सध्या जेलमध्येच…
२०१५ मध्ये कुविख्यात गुंड व वाळुमाफिया आप्पा लोंढे यांच्या खुनातील आरोपी संतोष भिमराव शिंदे (रा. शिंदवणे ता. हवेली), निलेश खंडु सोलनकर रा. डाळींब दत्तवाडी, ता. हवेली), राजेंद्र विजय गायकवाड रा. शिंदवणे, ता. हवेली), आकाश सुनिल महाडीक रा. उरुळी कांचन), विष्णु यशवंत जाधव रा. माळवाडी), नागेश लक्ष्मण झाडकर रा. उरुळी कांचन यांनी केला होता. त्यांना मोका केस मध्ये शिक्षा लागल्याने ते अद्याप जेलमध्ये आहेत.
सदर केस मध्ये रेकॉर्डवरील गुन्हेगार व वाळुतस्कर याने आरोपींना शिक्षा होऊ नये म्हणुन प्रयत्न केला या संशयावरुन २२ ऑक्टोंबर २०२१ रोजी संतोष जगताप याचे मर्डर केस मधील आरोपी नामे विष्णु यशवंत जाधव याने कट रचुन संतोष जगताप याचा खुन केला होता. सदर घटनेमध्ये समोरासमोर झालेल्या गोळीबारामध्ये संतोष जगताप व इतर दोघांचा खुन झाला होता. सदर घटनेमुळे त्यावेळी संपुर्ण पुणे शहर हादरले होते.
सदराची कामगिरी लोणी काळभोर पोलीस ठाण्याचे वरिष्ठ पोलीस निरीक्षक दत्तात्रय चव्हाण, पोलीस निरीक्षक (गुन्हे) सुभाष काळे, यांचे मार्गदर्शनाखाली पोलीस उपनिरीक्षक अमित गोरे यांचे पथकातील पोलीस हवालदार नितीन गायकवाड, सुदर्शन बोरावके, पोलीस नाईक अमित साळुंके, देवीकर, नागलोत, जाधव, गणेश भापकर, बाजीराव विर, शिरगीरे, कुदळे, फणसे यांनी केली आहे.
