Junnar News जुन्नर, ता. ८ : ओतूर (ता. जुन्नर) परिसरात घडलेल्या अत्यंत संतापजनक आणि हृदयद्रावक प्रकरणात स्वतःच्या अल्पवयीन मुलीवर लैंगिक अत्याचार करणाऱ्या नराधम बापाला अतिरीक्त जिल्हा व सत्र न्यायालय, जुन्नर यांनी जन्मठेपेची कठोर शिक्षा सुनावली आहे. आरोपी राजेश रामदास नवले याला पॉक्सो कायद्यान्वये दोषी ठरवत न्यायालयाने सश्रम जन्मठेप व दहा हजार रुपयांच्या दंडाची शिक्षा ठोठावली. Junnar News
ही धक्कादायक घटना १९ डिसेंबर २०२० रोजी दुपारी ओतूर पोलीस ठाण्याच्या हद्दीत घडली होती. पीडित नऊ वर्षीय मुलगी शाळेच्या मधल्या सुट्टीत जेवणासाठी घरी आली असताना, घरात कोणी नसल्याची संधी साधून आरोपी वडिलांनी घराचा दरवाजा आतून बंद केला. त्यानंतर मुलीला मारहाण करून तिच्यावर लैंगिक अत्याचार करण्यात आला. या अमानुष प्रकाराची माहिती समजताच पीडितेच्या आईने तत्काळ ओतूर पोलीस ठाण्यात धाव घेत तक्रार दाखल केली होती. Junnar News
तक्रारीनुसार आरोपीविरोधात भादंवि कलम ३७६, ३२३ तसेच लैंगिक अपराधांपासून बालकांचे संरक्षण अधिनियम (POCSO) अंतर्गत गुन्हा दाखल करण्यात आला होता. त्या वेळीचे प्रभारी पोलीस निरीक्षक पी.एच. कांबळे यांनी या गंभीर गुन्ह्याचा तपास स्वतःकडे घेत आरोपीला तातडीने अटक केली होती. तपासादरम्यान आरोपीविरोधात ठोस पुरावे गोळा करून न्यायालयात दोषारोपपत्र दाखल करण्यात आले. Junnar News
या प्रकरणाची सुनावणी विशेष न्यायाधीश एस.बी. शेलार यांच्या न्यायालयात झाली. सरकारी पक्षाने सादर केलेल्या पुराव्यांच्या आधारे आरोपी राजेश रामदास नवले याला दोषी ठरवत न्यायालयाने पॉक्सो कायद्याच्या कलम ४ अंतर्गत जन्मठेपेची सश्रम कारावासाची शिक्षा आणि १० हजार रुपयांचा दंड ठोठावला. दंड न भरल्यास सहा महिन्यांचा अतिरिक्त कारावास भोगावा लागणार आहे. तसेच मारहाणीप्रकरणी भादंवि कलम ३२३ अंतर्गत एक वर्ष सक्त कारावास आणि एक हजार रुपयांचा दंडाची शिक्षा सुनावण्यात आली आहे.
या प्रकरणात पुणे ग्रामीण पोलीस अधीक्षक संदिपसिंह गिल, अप्पर पोलीस अधीक्षक रमेश चोपडे, बारामती विभागाचे अप्पर पोलीस अधीक्षक गणेश बिरादार आणि जुन्नर उपविभागीय पोलीस अधिकारी धनंजय पाटील यांच्या मार्गदर्शनाखाली तपास करण्यात आला. सहायक पोलीस निरीक्षक ज्ञानेश्वर वाजगीरे, पोलीस निरीक्षक संतोष घोळवे, पोलिस हवालदार मनिषा ताम्हाणे, महिला कर्मचारी पूजा औटी, पोलीस निरीक्षक परशुराम कांबळे आणि हवालदार देविदास खेडकर यांनी तपासात महत्त्वाची भूमिका बजावली. अतिरिक्त सरकारी वकील जी. के. खोडे यांनी न्यायालयात प्रभावी बाजू मांडली.
