पुणे : भवानी पेठेतील पालखी विठोबा चौकात जुन्या वाड्याला रात्री भीषण आग लागल्याची घटना घडली असून आगीत एका ज्येष्ठ नागरिकाचा होरपळून मृत्यू झाला आहे. ज्येष्ठ नागरिक वाड्यात एकटा राहत असल्याची माहिती रहिवाशांनी दिली.
निलेश ठक्कर (वय ७०, रा. मणीभवन वाडा, पालखी विठोबा चौक, भवानी पेठ) असे मृत्युमुखी पडलेल्या ज्येष्ठ नागरिकाचे नाव आहे.
मिळालेल्या माहिती नुसार, पालखी विठोबा चौकात मणीभवन जुना लाकडी वाडा आहे. वाडा दुमजली आहे. ठक्कर वाड्यात एकटेच राहत होते. गुरुवारी (ता. २) रात्री साडेअकराच्या सुमारास वाड्यात अचानक आग लागली. या घटनेची माहिती मिळताच अग्निशमन दलाच्या मुख्य केंद्रातील बंब घटनास्थळी दाखल झाले.
त्यानंतर जवानांनी पाण्याचा मारा करुन आग आटोक्यात आणली. जवानांनी वाड्याची पाहणी असता, वाड्यातील स्वच्छतागृहात निलेश ठक्कर बेशुद्धावस्थेत सापडले. जवानांनी त्यांना तातडीने ससून रूग्णालयात दाखल केले. उपचारादरम्यान त्यांचा मध्यरात्री मृत्यू झाला.
