पुणे : पुण्यात अपघातांची मालिका थांबेना, कल्याणी नगर अपघात प्रकरण होऊन महिनाच उलटला असताना, आता वानवडी येथे भरधाव टँकरने सकाळी व्यायामासाठी बाहेर पडलेल्या मुलांना उडवल्याची घटना घडली आहे. तसेच पुढे एका दुचाकी चालक महिलेला देखील धडक दिली. हा अपघात सकाळी साडे सहाच्या सुमारास घडला असल्याची माहिती समोर आली आहे.
या अपघातात काही मुले आणि एक महिला जखमी झाली आहे. या अपघाताला कारणीभूत ठरलेला टँकर, १४ वर्षांचा मुलगा चालवीत होता. नागरिकांनी हा टँकर अडवून धरला असून चालकाला पकडून ठेवले आहे. दुचाकीवरून महापालिकेचे अधिकारी संतोष ढुमे आणि त्यांची पत्नी जात होती. त्यांच्या तालमीत शिकणाऱ्या मुली व्यायामासाठी रस्त्यावरून धावत होत्या. टँकरची दुचाकीला धडक बसताच त्यांची पत्नी दुचाकीवरून उडून थेट समोर रस्त्यावर पडली. तर, टँकरखाली दोन मुली आल्या. स्वतः ढुमे यांनी या मुलींना बाहेर काढले आहे.
पुण्यात कल्याणीनगर अपघात प्रकरणानंतर अनेक गंभीर अपघात घडलेआहेत. एका हायवा ट्रकने मार्केटयार्ड येथे एका महिलेला चिरडले होते. तसेच, कात्रज येथे एसटी बसच्या धडकेत अभियंता तरुणीचा प्राण गेला होता. उंड्री येथे ट्रक दुचाकीच्या झालेल्या अपघातात एका तरुणीला जीव गमवावा लागला होता.
एका पाठोपाठ एक असे अनेक अपघात घडत असताना, देखील अनेक अल्पवयीन मुले वाहने चालविताना शहरात दिसून येत आहेत. याला छाप कधी बसणार असा प्रश्न पडत असतानाच, आता अवजड टँकर अवघ्या १४ वर्षांच्या मुलाच्या ताब्यात देण्यात आल्याचा गंभीर प्रकार समोर आल्याने एकच खळबळ उडाली आहे. नागरिकांनी या अल्पवयीन मुलाला पकडून पोलिसांच्या ताब्यात दिले आहे. पुढील तपास पोलीस करत आहेत.
