Hadapsar News : पुणे : पहिल्या पत्नीचा मृत्यू झाल्यानंतर वर्षभरात त्याने दुसर्या महिलेबरोबर विवाह केला. मुलाने त्यांना वरच्या मजल्यावर राहण्यासाठी फ्लॅट दिला. हाच फ्लॅट माझ्या नावावर करून दे… असा तगादा महिलेने लावला. सततच्या मानसिक त्रासाला कंटाळून अखेर ज्येष्ठाने नागरिकाने गळफास घेऊन आत्महत्या केली आणि आपली जीवनयात्रा संपवली. हा प्रकार हडपसरमधील १५ नंबर चौक येथील किग्ज लॉज येथे घडला. याप्रकरणी संबंधित ज्येष्ठ नागरिकाच्या मुलाने दिलेल्या तक्रारीवरून महिलेविरोधात हडपसर पोलीस ठाण्यात गुन्हा दाखल करण्यात आला आहे.
महिलेविरोधात पोलीस ठाण्यात गुन्हा दाखल
याबाबत पोलिसांनी दिलेल्या अधिक माहितीनुसार, विलास गेणबा लगड (वय ६२, रा. लक्ष्मी कॉलनी, विठ्ठलनगर, हडपसर) असे आत्महत्या केलेल्या ज्येष्ठ नागरिकाचे नाव आहे. गळफास घेत असल्याचा व्हिडिओही त्यांनी रेकॉर्ड केल्याचे आढळून आले आहे. याबाबत त्यांचा मुलगा सागर विलास लगड (वय ३२) यांनी हडपसर पोलीस ठाण्यात फिर्याद दिली आहे. त्यानुसार पोलिसांनी सुजाता गुरव (वय ५०) हिच्याविरुद्ध गुन्हा दाखल केला आहे.
लगड यांची पहिली पत्नी ललिता लगड यांचे दोन वर्षांपूर्वी निधन झाले. त्यानंतर गेल्या वर्षी अचानक विलास लगड यांनी सुजाता गुरव हिच्याबरोबर विवाह केला. दरम्यान, त्यांच्या मुलाने त्यांना वरच्या मजल्यावर राहण्यास फ्लॅट दिला. मात्र, काही दिवसांनी दुसरी पत्नी घर आपल्या नावावर करण्यासाठी त्रास देऊ लागली. या त्रासाला कंटाळून लगड मे मध्ये घरातून निघून गेले होते. पोलिसांनी त्यांना शोधून परत आणले होते.
दरम्यान, पती-पत्नीत गेल्या आठ दिवसांपासून वादावादी झाली होती. सततच्या मानसिक त्रासाला कंटाळून लगड दुसरीकडे एकटेच रहात होते. अखेर विलास लगड यांनी किग्ज लॉज येथे गळफास घेऊन आत्महत्या केली.
पोलिसांनी लगड यांच्या मोबाईलची तपासणी केली असता, आपण सुजाता गुरव हिच्या त्रासाला कंटाळून आत्महत्या करीत आहे. माझ्या मृत्युला जबाबदार फक्त सुजाता गुरवच आहे, अशी चिठ्ठी लिहिली होती. तसेच मोबाईलमध्ये ते आत्महत्या करत असल्याचा व्हिडिओ त्यांनी रेकॉर्ड केल्याचे आढळून आले.
