Hadapsar News हडपसर, ता. ९ : “तुम्ही इथे काय करता? इथे का थांबले आहात?” असा जाब विचारत तिघा अज्ञात तरुणांनी दोन मित्रांवर धारदार शस्त्राने जीवघेणा हल्ला केल्याची धक्कादायक घटना हडपसर परिसरात ७ मे रोजी रात्री साडेअकराच्या सुमारास घडली आहे. या हल्ल्यात दोघांच्या डोक्यावर आणि हातावर गंभीर वार करण्यात आले असून, जखमींवर ससून रुग्णालयात उपचार सुरू आहेत. Hadapsar News
याप्रकरणी राहुल आवळे (वय ३७, व्यवसाय – फॅब्रिकेशन व कन्स्ट्रक्शन व्यावसायिक) यांनी हडपसर पोलीस ठाण्यात तक्रार दिली आहे. त्यानुसार तीन अज्ञात आरोपींविरोधात महाराष्ट्र पोलीस अधिनियम तसेच भारतीय न्याय संहिता २०२३ अंतर्गत विविध कलमान्वये गुन्हा दाखल करण्यात आला आहे. पोलिसांनी दिलेल्या माहितीनुसार, राहुल आवळे हे पुणे स्टेशन परिसरातील ताडीवाला रोड येथे कुटुंबासह राहतात. त्यांचे ‘आर्या फॅब्रिकेशन अँड कन्स्ट्रक्शन’ नावाचे दुकान असून त्यावरच कुटुंबाचा उदरनिर्वाह चालतो. Hadapsar News
राहुल आवळे हे त्यांचा मित्र दिलीप सावंत याच्यासोबत अरुणनगर येथील सुरुची हॉटेलमध्ये जेवणासाठी गेले होते. जेवण आटोपल्यानंतर दोघे हॉटेलबाहेर उभे असताना एक अनोळखी इसम त्यांच्या जवळ आला आणि “तुम्ही इथे काय करत आहात?” असा सवाल करू लागला. राहुल यांनी “तुला काय करायचे?” असे विचारताच त्या इसमाने वाद घालण्यास सुरुवात केली. त्याचवेळी त्याचे आणखी दोन साथीदार तेथे आले. त्यापैकी एकाने “हा टकल्या तुला काही बोलला का?” असे म्हणत राहुल यांना उद्देशून शिवीगाळ सुरू केली. राहुल यांनी त्याला जाब विचारताच तिघेही अधिक आक्रमक झाले. Hadapsar News
“तुम्ही इथले दिसत नाहीत, थांबा तुम्हाला दाखवतो,” असे म्हणत आरोपींनी अचानक धारदार शस्त्र काढून राहुल आवळे यांच्या डोक्यावर आणि हातावर सपासप वार केले. मित्राला वाचवण्यासाठी मध्ये पडलेल्या दिलीप सावंत यांच्यावरही आरोपींनी हातावर वार करत गंभीर जखमी केले. हल्ल्यानंतर दोघांनी मदतीसाठी आरडाओरडा केला. परिसरातील नागरिक जमा होऊ लागल्याचे पाहून आरोपी घटनास्थळावरून पसार झाले. जखमी अवस्थेत राहुल आवळे आणि दिलीप सावंत यांना उपचारासाठी ससून रुग्णालयात दाखल करण्यात आले. Hadapsar News
दरम्यान, राहुल आवळे यांनी “हल्ला करणारे आरोपी पुन्हा समोर आल्यास मी त्यांना ओळखू शकतो,” असे पोलिसांना सांगितले आहे. भररस्त्यात झालेल्या या जीवघेण्या हल्ल्यामुळे हडपसर परिसरात भीतीचे वातावरण निर्माण झाले असून, रात्रीच्या वेळी वाढत्या गुन्हेगारीबाबत नागरिकांनी चिंता व्यक्त केली आहे. हडपसर पोलीस सीसीटीव्ही फुटेजच्या आधारे आरोपींचा शोध घेत आहेत.
