(Hadapsar Crime ) हडपसर, (पुणे) : आईने आपल्या पोटच्या चार वर्षीय मुलीची चाकूने भोसकून हत्या केल्याची धक्कादायक (Hadapsar Crime) घटना घडली आहे. सोमवारी (ता. २७) रात्री साडेनऊ वाजण्याच्या सुमारास काळीज पिळवटून टाकणारी ही घटना उघडकीस आली आहे. हडपसर पोलिसांनी आईला अटक केली आहे.
वैष्णवी महेश वाडेर (वय ४ वर्ष) असं हत्या झालेल्या मुलीचे नाव आहे. या प्रकरणी तिची आई कल्पी (पूर्ण नाव समजू शकले नाही) हिला हडपसर पोलिसांनी ताब्यात घेतले आहे. आरोपी आईने ही हत्या कोणत्या कारणातून केली हे मात्र अद्याप अस्पष्ट आहे.
हडपसर पोलीस ठाण्याचे वरिष्ठ पोलीस निरीक्षक अरविंद गोकुळे यांनी दिलेल्या प्राथमिक माहितीनुसार…!
आरोपी महिला ही तिच्या मुलीसोबत एकटीच राहत होती. महिन्यापूर्वी ती तेथे राहण्यास आली होती. बेकरी प्रॉडक्ट विक्रीचा व्यवसाय आरोपी महिला करत होती.
सोमवारी ती भाड्याचे घर खाली करणार होती. त्यामुळे घरमालक तेथे गेले होते. त्यावेळी तिने दरवाजा आतून बंद करून घेतला होता. शेजारच्यांनी महिलेला दरवाजा उघडण्यास सांगितले. मात्र, तिने दरावाजा उघडला नाही. शेवटी घरमालक आणि शेजाऱ्यांनी आत जाऊन पाहिले असता मुलीचा मृतदेह दिसून आला.
दरम्यान, त्यांनी तात्काळ याची माहिती पोलिसांना दिली. त्यानंतर हडपसर पोलिसांनी घटनास्थळी धाव घेतली. मुलीची हत्या करणाऱ्या महिलेला पोलिसांनी ताब्यात घेतलं आहे. पुढील तपास पोलीस करीत आहेत.
