Daund News दौंड, ता. १७ : दौंड शहरात हद्दपार आदेश धुडकावून पुन्हा प्रवेश करणाऱ्या आरोपीवर पोलिसांनी मोठी कारवाई केली आहे. पोलिसांनी ताब्यात घेण्याचा प्रयत्न करताच आरोपीने पोलिसांनाच धक्काबुक्की करून पळून जाण्याचा प्रयत्न केल्याने परिसरात काही काळ तणावाचे वातावरण निर्माण झाले होते. अखेर पोलिसांनी पाठलाग करून आरोपीला जेरबंद केले. Daund News
या प्रकरणी महेश रमेश चोरमले (रा. गोपाळवाडी, ता. दौंड, जि. पुणे) याच्याविरोधात दौंड पोलीस ठाण्यात भारतीय न्याय संहिता कलम १३२, २२३ तसेच महाराष्ट्र पोलीस अधिनियम कलम १४२ अन्वये गुन्हा दाखल करण्यात आला आहे. याबाबत पोलीस हवालदार निखील बाळासाहेब जाधव यांनी फिर्याद दिली आहे. Daund News
पोलिसांनी दिलेल्या माहितीनुसार, उपविभागीय दंडाधिकारी रेवणनाथ लबडे यांच्या न्यायालयाने १८ मार्च २०२६ रोजी आरोपी महेश चोरमले याला मुंबई पोलीस अधिनियम कलम ५६(१)(अ)(ब) अंतर्गत पुणे, सोलापूर, सातारा आणि अहिल्यानगर जिल्ह्याच्या हद्दीतून एक वर्षासाठी हद्दपार केले होते. मात्र, हा आदेश धाब्यावर बसवत आरोपी १६ मे रोजी रात्री सरपंचवस्ती परिसरात फिरताना पोलिसांना आढळून आला. पुष्पलक्ष्मी हॉस्पिटल ते बोरावकेनगरकडे जाणाऱ्या जुन्या भाजी मंडई रोड परिसरात पोलिसांनी त्याला ताब्यात घेण्याचा प्रयत्न केला. यावेळी आरोपीने पोलिसांशी झटापट करत धक्काबुक्की केली आणि पळून जाण्याचा प्रयत्न केला. Daund News
या घटनेमुळे परिसरात काही काळ गोंधळाचे वातावरण निर्माण झाले. मात्र, पोलिसांनी तत्परता दाखवत आरोपीला ताब्यात घेतले. आरोपीने सरकारी कामात अडथळा आणल्याप्रकरणी त्याच्यावर अतिरिक्त कलमेही लावण्यात आली आहेत. या प्रकरणाचा पुढील तपास पोलीस हवालदार भोसले करत असून, दाखल अंमलदार म्हणून पोलीस हेडकॉन्स्टेबल मखरे यांनी काम पाहिले. दरम्यान, हद्दपार आरोपी पुन्हा शहरात दाखल झाल्याने नागरिकांमध्येही चिंता व्यक्त केली जात आहे. Daund News
