Daund Bullet News दौंड, ता. १४ : शहर व परिसरात कर्णकर्कश आवाज करणाऱ्या मॉडिफाईड सायलेंसरच्या बुलेट आणि इतर दुचाकी वाहनांवर दौंड पोलिसांनी धडक कारवाई करत १९ वाहनांवरील बेकायदेशीर सायलेंसर हटविले. या कारवाईमुळे ध्वनीप्रदूषणाला आळा बसणार असून नागरिकांनी दौंड पोलिसांच्या या उपक्रमाचे स्वागत केले आहे. Daund Bullet News
दौंड पोलीस ठाण्याच्या हद्दीत काही बुलेट व इतर मोटारसायकल चालकांनी मूळ सायलेंसरमध्ये बदल करून मोठा आणि कर्णकर्कश आवाज करणारे मॉडिफाईड सायलेंसर बसविले होते. त्यामुळे सर्वसामान्य नागरिक, विद्यार्थी, ज्येष्ठ नागरिक तसेच रुग्णांना मोठा त्रास सहन करावा लागत होता. या वाहनांमुळे सार्वजनिक शांतता व सुव्यवस्थेलाही बाधा येत असल्याच्या तक्रारी पोलिसांकडे प्राप्त झाल्या होत्या. Daund Bullet News
या पार्श्वभूमीवर पोलीस निरीक्षक हेमंत शेडगे यांच्या मार्गदर्शनाखाली दौंड पोलिसांनी विशेष मोहीम राबविली. मोहिमेदरम्यान एकूण १९ बुलेट व इतर दुचाकी वाहनांची तपासणी करण्यात आली. तपासणीत नियमबाह्य मॉडिफाईड सायलेंसर आढळून आल्याने ते तात्काळ काढून टाकण्यात आले. तसेच संबंधित वाहनचालकांवर मोटार वाहन कायद्यानुसार दंडात्मक कारवाई करण्यात आली.
यावेळी वाहनधारकांना भविष्यात वाहनांमध्ये बेकायदेशीर बदल न करण्याच्या सूचना देण्यात आल्या. ध्वनीप्रदूषण निर्माण करणाऱ्या आणि मोटार वाहन कायद्याचे उल्लंघन करणाऱ्या वाहनचालकांविरुद्ध भविष्यातही अशाच प्रकारच्या कठोर कारवाया सातत्याने सुरू राहणार असल्याची माहिती पोलीस निरीक्षक हेमंत शेडगे यांनी दिली.
दौंड पोलिसांनी नागरिकांना आवाहन करताना वाहनांमध्ये नियमबाह्य बदल टाळावेत आणि वाहतूक नियमांचे पालन करून सार्वजनिक शांतता राखण्यास सहकार्य करावे, असेही म्हटले आहे.
