Bribe सिंधुदुर्ग : बलात्काराचा गुन्हा दाखल करण्याची धमकी देत पोलीस उपनिरीक्षकासह हवालदाराने 40 हजार रुपयांची लाच मागितल्याचा धक्कादायक प्रकार समोर आला आहे. दरम्यान लाच लुचपत विभागाने सापडा लावून दोघांना 20 हजार रुपयांची लाच घेताना रंगेहात पकडले आहे. वैभववाडी पोलीस ठाण्यात हे दोन्ही कर्मचारी कार्यरत असून या घटनेनंतर पोलीस दलात एकच खळबळ उडाली आहे.
सुरज पाटील असे पोलीस उपनिरीक्षक नाव असून मारुती साखरे पोलीस हवालदाराचे नाव आहे. याप्रकरणी वैभववाडी पोलीस ठाण्यात दोघांविरुद्ध गुन्हा दाखल करण्यात आला आहे.
मिळालेल्या माहितीनुसार…!
पाटील व साखरे यांनी तक्रारदाराला तुझ्याविरोधात कलम 376 अंतर्गत बलात्काराचा गुन्हा दाखल करतो अशी धमकी देत तक्रारदार यांच्याकडे 40 हजार रुपयांची लाच मागितली होती. त्यातील 20 हजार रुपये देण्याचे ठरले होते. यानंतर तक्रारदार यांनी सिंधुदुर्ग लाचलुचपत प्रतिबंधक विभागाशी संपर्क साधून याबाबत तक्रार दाखल केली. दरम्यान ठरल्यानुसार लाचलुचपतच्या पथकाने या ठिकाणी सापळा रचला त्या दोघांना 20 हजार रुपयांची रोख रक्‍कम घेताना रंगेहाथ पकडले.
दरम्यान, या कारवाईनंतर पाटील व साखरे यांच्या घरावर एसीबीच्या पथकाने छापा टाकला व त्यांच्या मालमत्तेसह कागदपत्रांची चौकशी सुरु केली.
