पुणे : पिंपरी- चिंचवडमधून बेपत्ता झालेल्या वकिलाचा मृतदेह महाराष्ट्र तेलंगणा सीमेवरील मदनुर येथे अर्धवट जळालेल्या अवस्थेत आढळल्याची धक्कादायक घटना नुकतीच उघडकीस आली आहे. यामुळे पिंपरीचिंचवड शहरासह पुणे जिल्ह्यात एकच खळबळ उडाली आहे.
शिवशंकर शिंदे असे मृत झालेल्या वकिलाचे नाव आहे. याप्रकरणी वाकड पोलीस ठाण्यात बेपत्ता झाल्याची तक्रार शिंदे यांच्या नातेवाईकांनी दिली होती.
पोलिसांनी दिलेल्या माहितीनुसार, शिवशंकर शिंदे हे वकील असून त्यांचे काळेवाडी येथे ऑफिस आहे. शिंदे हे ऑफिसमधून शनिवारी (ता.३१ डिसेंबर) दुपाराच्या सुमारास बेपत्ता झाले होते. त्यानंतर नातेवाईकांनी शिंदे यांना संपर्क करण्याचा प्रयत्न केला. मात्र त्यांचा फोन लागला नाही. याप्रकरणी वाकड पोलीस ठाण्यात बेपत्ता शिंदे बेपत्ता झाल्याची तक्रार नोंदविण्यात आली होती. त्याअनुषंगाने पिंपरी चिंचवड पोलीस तपास करीत होते.
पोलीस तपास करीत असताना, पोलिसांना शिवशंकर शिंदे यांचा अर्धवट जळलेला मृतदेह महाराष्ट्र तेलंगणा सीमेवरील मदनुर येथे आढळला आहे. पिंपरी- चिंचवड पोलीस हे शिवशंकर यांची अपहरण करून हत्या तर झाली नाही. या दिशेने देखील तपास करत आहेत.
दरम्यान, मृत शिवशंकर शिंदे यांच्या काळेवाडीतील ऑफिसमध्ये त्यांच्याशी अज्ञात व्यक्तीने झटापट केल्याचा संशय पोलिसांना आहे. तिथे, तुटलेली बटन आणि रक्त आढळले आहे. यामुळे त्यांचे अपहरण करून तर हत्या केली नाही ना असा संशय पोलिसांना आहे. त्याचा उलगडा करणे पोलिसांसमोर मोठे आव्हान असणार आहे. पुढील तपास पिंपरी- चिंचवड पोलीस तपास करत आहेत.
