सागर जगदाळे
भिगवण : भरधाव वेगाने निघालेल्या ट्रॅक्टरच्या धडकेने दुचाकी चालकाचा जागीच मृत्यू झाला असून दुचाकीवर मागे बसलेला एकजण गंभीर जखमी झाला.
या घटनेची फिर्याद भिगवण पोलीस ठाण्यात मोहम्मद अफिज्युदीन बहारुदीन अन्सारी, (वय २९ वर्ष, सध्या रा. अन्नपुर्णा हॉटेल, यवत ता. दौड जि. पुणे मुळ रा. डाबाकेद ता. नारायणपुर जि. जामताडा, झारखंड) यांनी दिली असून त्यावरून ट्रॅक्टर चालक अमोल संजीव नंदे, (वय 28 वर्षे, सध्या रा.मांजरगाव ता.करमाळा जि. सोलापुर मुळ रा. जैनवाडी ता. चिकोडी जि. बेळ राज्य कर्नाटक) याच्यावर गुन्हा दाखल करण्यात आला आहे.
याबाबत भिगवण पोलिसांकडून मिळालेल्या माहितीनुसार सोमवारी (दि.१५) रोजी दुपारी १२.३० वा. भिगवण राशिन रोडवरील हॉटेल तुळजाभवानी समोर आरोपी ट्रॅक्टरचालक अमोल संजीव नंदे त्याच्या ताब्यातील ट्रॅक्टर हा मदनवाडी चौकातून राशिनकडे भरधाव वेगाने रहदारीच्या नियमांकडे दुर्लक्ष करत वेगाने चालला होता.
त्याचवेळेस समोरुन मदनवाडी चौकाकडे जाणाऱ्या युनिकॉर्न मोटारसायकला (एमएच ४२ पी ७०००) जोराची धडक दिली. यात दुचाकीस्वार मोहम्मद आबिद बहारुदीन अन्सारी, (वय २४ वर्ष सध्या रा. रॉयल इन हॉटेल भिगवण ता. इंदापुर जि. पुणे मुळ रा. डाबाकेंद ता. नारायणपुर जि. जामताड़ा राज्य झारखंड) यांच्या डोक्याला गंभीर दुखापत झाली.
मात्र रुग्णालयात उपचारादरम्यान मृत्यू झाला. दुचाकीवर पाठीमागे बसलेल्या साथीदाराला ही गंभीर दुखापत झाली असून त्याच्या ही डोक्याला गंभीर दुखापत झाली आहे.
सदर अपघाताचा पुढील तपास पोलीस हवालदार करे हे करीत आहे.
