वडगाव निंबाळकर, (पुणे) : नांगरटीचे काम सुरू असताना जुन्या वादातून दोन इसमांनी शेतकऱ्यावर कोयत्याने वार करून त्यांना जिवे मारण्याचा प्रयत्न केल्याची घटना घडली आहे. मध्यस्थी करणाऱ्या ट्रॅक्टर चालकालाही दगडफेकीत दुखापत झाली आहे. याप्रकरणी दोघांवर वडगाव निंबाळकर पोलीस ठाण्यात गुन्हा दाखल करण्यात आला आहे.
निवृत्ती आप्पा खामगळ (वय-43, शेती, व्यवसाय रा. खामगळवाडी ता. बारामती) असे मारहाण झालेल्या शेतकऱ्याचे नाव आहे. तर तात्याबा आंदु खामगळ व रविंद्र तात्याबा खामगळ (रा. दोन्ही खामगळवाडी ता. बारामती) गुन्हा दाखल करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, फिर्यादी निवृत्ती आप्पा खामगळ (वय-43) हे 12 एप्रिल 2026 रोजी सकाळी साडे आठ वाजण्याच्या सुमारास आपल्या शेतात संपत ठोंबरे आणि मनोज पडळकर यांच्या ट्रॅक्टरने नांगरट व लेव्हलिंगचे काम करून घेत होते. संबंधित जमिनीचा निकाल कोर्टाकडून फिर्यादीच्या बाजूने लागला असल्याने ते हे काम करत होते.
काम सुरू असताना आरोपी तात्याबा खामगळ आणि रविंद्र खामगळ हे दोघे हातात ऊस तोडणीचे कोयते घेऊन तिथे आले. सुरुवातीला आरोपी रविंद्रने ट्रॅक्टरच्या बोनेटवर कोयता मारून तोडफोड केली आणि शिवीगाळ सुरू केली. निवृत्ती खामगळ यांनी त्यांना कोर्टाच्या निकालाची माहिती देण्याचा प्रयत्न केला असता, आरोपी तात्याबा याने पाठीमागून येऊन “तुला आता जिवंत सोडत नाही” असे ओरडून निवृत्ती यांच्या डोक्यावर उजव्या कानाच्या वर कोयत्याने जोरात वार केला.
पहिल्या वारानंतर आरोपी रविंद्रनेही निवृत्ती यांच्या डोक्यावर पाठीमागून कोयता मारून जखमी केले. डोक्यातून मोठ्या प्रमाणात रक्तस्त्राव सुरू झाल्याने निवृत्ती यांनी तिथून पळ काढला. त्यानंतर ट्रॅक्टर घेऊन बाहेर जाणाऱ्या संपत ठोंबरे यांच्यावरही आरोपींनी दगडफेक केली, ज्यामध्ये ठोंबरे यांच्या हाताच्या बोटाला दुखापत झाली आहे.
दरम्यान, याप्रकरणी वडगाव निंबाळकर पोलिसांनी वरील दोघांवर गुन्हा दाखल केला असून तपास पोलीस करीत आहेत.
