loni kalbhor लोणी काळभोर, ता. 21 : पुणे–सोलापूर राष्ट्रीय महामार्गावर कदमवाकवस्ती (ता. हवेली) ग्रामपंचायत हद्दीतील वाकवस्ती परिसरात मंगळवारी (ता. 21) दुपारी सुमारे अडीच वाजण्याच्या सुमारास डंपर आणि दुचाकी यांच्यात भीषण अपघात झाला. या अपघातात डंपर अंगावरून गेल्याने तरुणाचा जागीच मृत्यू झाला. या घटनेने परिसरात मोठी खळबळ उडाली असून नागरिकांमध्ये हळहळ व्यक्त होत आहे. loni kalbhor
मृत तरुणाचे नाव अंकुश (पूर्ण नाव अद्याप समजू शकलेले नाही) असे असून तो बारामती येथील एका सोन्याच्या दुकानात काम करत होता. मिळालेल्या प्राथमिक माहितीनुसार, अंकुश हा बारामतीकडून पुण्याकडे दुचाकीवरून येत असताना हा अपघात झाला. वेगात येणाऱ्या डंपरने दुचाकीला जोरदार धडक दिल्यानंतर तोल जाऊन अंकुश रस्त्यावर पडला आणि डंपर त्याच्या अंगावरून गेला. loni kalbhor
अपघात घडताच परिसरातील नागरिकांनी घटनास्थळी धाव घेतली. जखमी अवस्थेत असलेल्या अंकुशला तातडीने लोणी काळभोर येथील विश्वराज हॉस्पिटलमध्ये दाखल करण्यात आले. मात्र, तेथील डॉक्टरांनी तपासणीअंती त्याचा मृत्यू उपचारापूर्वीच झाल्याचे घोषित केले. या घटनेतील एक धक्कादायक बाब म्हणजे, मृताच्या जवळ सुमारे 30 ग्रॅम सोन्याचे बिस्कीट आढळून आले. त्यामुळे अपघाताच्या वेळी तो मौल्यवान वस्तू घेऊन प्रवास करत असल्याचे स्पष्ट झाले आहे. loni kalbhor
या घटनेची माहिती मिळताच लोणी काळभोर पोलीस ठाण्याचे पोलीस हवालदार महेश करे, बीट मार्शल महेंद्र आगळे व त्यांच्या सहकाऱ्यांनी तातडीने घटनास्थळी व रुग्णालयात धाव घेतली. पोलिसांनी पंचनामा करून मृतदेह ताब्यात घेतला असून नातेवाईकांना घटनेची माहिती देण्यात आली आहे. loni kalbhor
