लोणी काळभोर : लोणी काळभोर परिसरात दोन रिक्षाचालकांमध्ये रविवारी (ता.२५) सकाळी वाद झाले. याचा मनात राग धरून रिक्षाचालकाला दारू पिण्याच्या बहाण्याने बोलावून खून करणाऱ्या आरोपीला हडपसर पोलिसांनी बेड्या ठोकल्या आहेत.
कृष्णा विठ्ठल रेखले (वय २७, रा. कवडीपाट टोल नाका, लोणी काळभोर) असे अटक करण्यात आलेल्या आरोपीचे नाव आहे. तर सागर राहुल गायकवाड (वय २४, रा. लक्ष्मी माता मंदिराजवळ, हडपसर) असे खून झालेल्या रिक्षाचालकाचे नाव आहे. याप्रकरणी अक्षदा प्रतीक वाघमारे (वय २२, रा. शांतीनगर वसाहत, हडपसर) यांनी हडपसर पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, सागर गायकवाड आणि कृष्णा रेखले हे दोघेही रिक्षाचालक आहेत. रविवारी सकाळी लोणी काळभोर परिसरात त्या दोघांमध्ये वाद झाले. त्यानंतर आरोपी कृष्णा रेखले याने याचा मनात राग धरून सागर गायकवाड याला दारू पिण्यासाठी बोलाविले. आणि त्यानंतर सागरला हडपसर भागातील नारळाच्या बागेजवळ दांडक्याने बेदम मारहाण करुन खून केला. याप्रकरणी अक्षदा वाघमारे यांनी हडपसर पोलीस ठाण्यात तक्रार दिली.
दरम्यान, पोलीस उपायुक्त नम्रता पाटील, सहायक पोलीस आयुक्त बजरंग देसाई, हडपसर पोलीस ठाण्यातील गुन्हे शाखेचे पोलीस निरीक्षक दिगंबर शिंदे यांनी घटनास्थळी भेट दिली. पोलिसांनी रेखले याला ताब्यात घेतले आहे.
