Ahmednagar News : अहमदनगर : जीवे मारण्याचा प्रयत्न करून प्रवाशाजवळील ५ हजाराची रोकड व सॅमसंग मोबाईल घेऊन पसार झालेल्या आरोपीला कोतवाली पोलिसांनी पाठलाग करून पुणे बसस्थानक परिसरातून मोठ्या शिताफीने पकडले आहे.
अकिब उर्फ चुस्या जिशान सय्यद (वय-३०, रा. वाबळे कॉलनी, फकीरवाडा अहमदनगर) असे अटक करण्यात आलेल्या आरोपीचे नाव आहे. याप्रकरणी भगवंत नागराज थोरात (वय ४२, धंदा मजुरी रा. जेलरोड, नाशिक जि.नाशिक) यांनी कोतवाली पोलिस ठाण्यात फिर्याद दिली होती.
५ हजाराची रोकड व सॅमसंग मोबाईल घेऊन पसार झालेल्या आरोपीला अटक
पोलिसांनी दिलेल्या माहितीनुसार, भगवंत थोरात यांना माळीवाडा बसस्थानकाच्या जवळ दोन अनोळखी इसमांनी मोपेड दुचाकीवर बळजबरीने बसविले. आणि त्यांना जीवे मारण्याचा प्रयत्न करून त्यांच्याकडील पाच हजाराची रोकड व मोबाईल चोरून नेला होता. याप्रकरणी थोरात यांनी कोतवाली पोलिस ठाण्यात फिर्याद दिली होती. सदर गुन्ह्याचे गांभीर्य लक्षात घेऊन कोतवाली पोलीस ठाण्याचे वरिष्ठ पोलीस निरीक्षक चंद्रशेखर यादव यांनी आरोपींच्या शोधासाठी पथके तयार करून रवाना केली.
सदर गुन्ह्याचा तपास करीत असताना, हा गुन्हा अकिब सय्यद याने केला असून तो पुणे बस स्थानक परिसरात येणार आहे. अशी माहिती पोलिसांना मिळाली होती. मिळालेल्या माहितीच्या अनुषंगाने पोलिसांनी पुणे बसस्थानक परिसरात सापळा रचला होता.
दरम्यान, आरोपी अकिब सय्यद याला पोलिसांची चाहूल लागताच, आरोपीने मोटरसायकलवरून पळून जाण्याचा प्रयत्न केला. मात्र पोलिसांनी आरोपीचा पाठलाग करून माळीवाडा बस स्थानक हातमपुरा मार्केट यार्ड चौक सहकार सभागृह महात्मा फुले चौक सारसनगर या परिसरातून मोठ्या शिताफीने ताब्यात घेतले. तसेच आरोपी सय्यद याने त्याचा साथीदार जाबीर ऊर्फ जानु सादिक सय्यद (रा.शाहा कॉलनी गोविंदपुरा अहमदनगर) याच्या मदतीने गुन्हा केल्याची कबुली दिली आहे. पुढील तपास सहाय्यक पोलीस निरीक्षक विश्वास भांसी करीत आहेत.
सदर उल्लेखनीय कामगिरी कोतवाली पोलीस ठाण्याचे वरिष्ठ पोलीस निरीक्षक चंद्रशेखर यादव यांच्या मार्गदर्शनाखाली पोलीस अंमलदार तनवीर शेख, गणेश धोत्रे, योगेश भिंगारदिवे, सलीम शेख, रियाज इनामदार, अभय कदम, संदिप थोरात, अमोल गाढे, कैलास शिरसाठ, सागर मिसाळ, सोमनाथ राऊत, सुजय हिवाळे, अतुल काजळे यांच्या पथकाने केली आहे.
