लोणी काळभोर (पुणे) : लोणी काळभोर (ता. हवेली) पोलीस ठाण्यातील गस्त घातल असताना बीट मार्शल पोलिसाला कवडीपाट टोलनाक्याजवळ मारल्याची घटना काल बुधवारी (ता.१५) मध्यरात्री साडेबारा वाजण्याच्या सुमारास घडलेली असतानाच आता, प्रतिनियुक्तीवर असलेल्या महिला पोलिसाला एका महिलेने अश्लील भाषेत शिवीगाळ करून चप्पलने मारहाण केल्याची धक्कादायक घटना पुण्यातील टिळक चौकात आज गुरुवारी (ता.१७) दुपारच्या सुमारास घडली आहे. यामुळे पुणे शहर पोलीस दलात खळबळ उडाली आहे. तर खुद्द पोलिसांचीच सुरक्षितता धोक्यात आली आहे.
याप्रकरणी ३६ वर्षीय महिला पोलीसाने विश्रामबाग पोलीस ठाण्यात तक्रार दिली आहे. त्यानुसार पोलिसांनी ३५ वर्षीय महिलेला अटक केली आहे. पोलिसांनी दिलेल्या माहितीनुसार, तक्रारदार या विश्रामबाग वाहतूक विभागात कर्तव्यास असून, त्या प्रतिनियुक्तीवर येथे आहेत. तक्रारदार आज बुधवारी टिळक चौकात दुपारी दीड वाजण्याच्या सुमारास वाहतूक नियमन करत होत्या.
दरम्यान, आरोपी महिलेची वाहतूक पोलिसांनी दुचाकी उचलून आणली होती. त्यामुळे संबंधित महिला दुचाकीसाठी टिळक चौकात आली होती. तक्रारदार या उभारल्या असताना, महिला त्यांच्याजवळ आली व माझी गाडी येथे का आणली अशी विचारणा केली. तक्रारदारांनी त्यांची गाडी उचलली नसल्याने तसेच त्या विश्रामबाग विभागात असल्याने त्यांनी महिलेला मला माहित नाही. मी दुसऱ्या विभागात कर्तव्यास आहे. तुम्ही शेजारी असलेल्या फरासखाना वाहतूक विभागात चौकशी करा.
त्यानंतर आरोपी महिलेला राग तक्रारदार यांचा राग आला. आणि आरोपी महिलेने थेट अश्लील भाषेत शिवीगाळ करत त्यांना पायातील चप्पल काढून थेट मारहाण करण्यास सुरूवात केली. भरदुपारी गजबजलेल्या चौकात तिने महिला कर्मचाऱ्यांना चप्पलने बेदम मारहाण केली. तर, त्यांचा ड्रेस फाडून त्यांच्या चेहऱ्यावर नख देखील ओरखाडले. याप्रकरणी तक्रारदार महिला पोलिसांनी विश्रामबाग पोलीस ठाण्यात तक्रार दिली आहे. त्यानुसार पोलिसांनी ३५ वर्षीय महिलेला अटक केली आहे.
पोलिसांच्या सुरक्षिततेचा प्रश्न
सध्या पुणे शहर भागातील पोलिसांवर होणाऱ्या हल्ल्यात वाढ झाली असून त्यांच्या सुरक्षिततेचा प्रश्न ऐरणीवर आला आहे. कालच बुधवारी (ता.१५) मध्यरात्री साडेबारा वाजण्याच्या सुमारास लोणी काळभोर (ता. हवेली) पोलीस ठाण्यातील गस्त घातल असताना बीट मार्शल पोलिसाला मारहाण करून जीवे मारण्याची धमकी दिली होती. त्यानंतर लोणी काळभोर पोलिसांनी आरोपी विवेक किशोर साळुंखे (वय-२६. रा.साळुंखे वस्ती मांजरी खुर्द पुणे) व मयुर बबन आंबेकर ( वय २८ ) यांना अटक केली आहे.
या मारहाणीत बीट मार्शल संदीप धुमाळ हे गंभीर जखमी झाले असून त्यांच्यावर लोणी काळभोर येथील विश्वराज हॉस्पिटलमध्ये उपचार घेत आहेत. या घटनेला अवघे काही तासच उलटण्याच्या आतच दुसरी घटना समोर आली आहे. पुण्यातील टिळक चौकात महिला पोलिसाला चप्पलने मारहाण केल्याची घटना घडली आहे. पुणे शहर पोलीस दलात खळबळ उडाली असून खुद्द पोलिसांच्याच सुरक्षिततेच प्रश्न निर्माण झाला आहे.
