पुणे : चंदननगर परिसरात दहशत माजविणाऱ्या आदिल इफ्तेकार सय्यद (वय 24, रा. वडगावशेरी) या गुंडाविरुद्ध झोपडपट्टी दादा प्रतिबंधक कायद्यान्वये (एमपीडीए) कारवाई करण्यात आली आहे. पोलीस आयुक्त अमितेश कुमार यांच्या आदेशानुसार सय्यदला वर्षभरासाठी बुलढाणा कारागृहात स्थानबद्ध करण्यात आले आहे.
सय्यद याच्याविरुद्ध गंभीर स्वरूपाचे एकूण 6 गुन्हे नोंदवले गेले आहेत. त्यात टोळी बनवून दमदाटी करणे, बेकायदा शस्त्र बाळगणे, गंभीर दुखापत करणे, खुनाचा प्रयत्न करणे, जबरी चोरी करणे तसेच पिस्तुलाचा धाक दाखवून दहशत माजविणे यांचा समावेश आहे. या गुन्हेगारी कृत्यांमुळे परिसरात भीतीचे वातावरण निर्माण झाले होते. त्याच्या दहशतीमुळे नागरिक तक्रार नोंदवण्यासही घाबरत होते.
चंदननगर पोलीस ठाण्याच्या वरिष्ठ पोलीस निरीक्षक सीमा ढाकणे यांच्या मार्गदर्शनाखाली सय्यदविरुद्ध एमपीडीए अंतर्गत कारवाईचा प्रस्ताव तयार करण्यात आला. हा प्रस्ताव परिमंडळ 4 चे पोलीस उपायुक्त सोमय मुंढे यांच्या माध्यमातून पोलीस आयुक्त अमितेश कुमार यांच्याकडे पाठविण्यात आला. त्यानंतर आयुक्तांनी हा प्रस्ताव मंजूर करत सय्यदला कारागृहात डांबण्याचे आदेश दिले.
या कारवाईनंतर सय्यदला बुलढाणा कारागृहात हलविण्यात आले असून, त्याला पुढील 1 वर्षासाठी स्थानबद्ध करण्यात आले आहे. शहरातील कायदा व सुव्यवस्थेच्या दृष्टीने ही कारवाई महत्त्वाची मानली जात आहे. पोलीस आयुक्त अमितेश कुमार यांच्या आदेशानुसार आतापर्यंत पुणे शहरातील शंभरहून अधिक सराईत गुंडांविरुद्ध एमपीडीए अंतर्गत कारवाई करण्यात आली आहे. त्यामुळे गुन्हेगारी प्रवृत्तीला आळा बसण्यास मदत होत आहे.
