लोणी काळभोर, (पुणे) : पुणे-सोलापूर महामार्गावर एका भरधाव ट्रकने टाटा नेक्सॉन कारला पाठीमागून जोरदार धडक दिली. कुंजीरवाडी (ता. हवेली) येथील स्वामी समर्थ मंदिराजवळ रविवारी (ता. 10) रात्री पाऊणे अकरा वाजण्याच्या सुमारास ही घटना घडली. याप्रकरणी ट्रक चालकाविरुद्ध गुन्हा दाखल केला आहे.
याप्रकरणी प्रवीण बलभिम धाईजे (वय 33, धंदा नोकरी रा. मांजरी स्टडफॉर्म, शेवाळवाडी, मांजरी, ता. हवेली) यांनी लोणी काळभोर पोलीस ठाण्यात फिर्याद दिली आहे. त्यानुसार ट्रक चालक बापु नरहरी गपाट वय- 42 वर्षे, धंदा ड्रायव्हर रा. मारुती मंदिराजवळ, इंदापुर ता. वाशी जि. धाराशिव) याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, प्रवीण धाईंजे हे आपल्या कुटुंबाला भेटून इंदापूरहून पुण्याकडे टाटा नेक्सॉन कारने परतत होते. कुंजीरवाडी हद्दीत आले असता, पाठीमागून अत्यंत वेगाने येणाऱ्या एका अशोक लेलँड ट्रकने रस्ते सुरक्षा नियमांकडे दुर्लक्ष करत कारला पाठीमागून जोरदार धडक दिली.
ही धडक इतकी भीषण होती की, नेक्सॉन कारच्या पाठीमागील बाजूचा आणि डिकीचा पूर्णपणे चक्काचूर झाला. अपघातानंतर महामार्गावर काही काळ वाहतूक कोंडी झाली होती. सुदैवाने, कारमधील प्रवाशांना कोणतीही गंभीर दुखापत झाली नाही. अपघाताची माहिती मिळताच लोणी काळभोर पोलिसांनी घटनास्थळी धाव घेतली. त्यानुसार वाहतूक कोंडी सोडवली.
दरम्यान, या प्रकरणी धाईजे यांनी दिलेल्या तक्रारीनुसार, ट्रक चालक बापू गपाट याच्याविरुद्ध भारतीय न्याय संहितेच्या विविध कलमान्वये आणि मोटार वाहन अधिनियमांतर्गत गुन्हा दाखल करण्यात आला आहे. या घटनेचा पुढील तपास पोलीस हवालदार संतोष बरगजे करत आहेत.
