पुणे : काही दिवसापासून घरातून बेपत्ता असणाऱ्या युवकाने आंबेगाव तालुक्यातील पारगाव गावाजवळ असणाऱ्या पहाडदरा येथे आत्महत्या केल्याची घटना घडली आहे. तीन लग्न होऊन देखील तिन्ही बायका नांदत असल्याने त्याने नैराश्यातून आत्महत्या केली. शेखर शांताराम पवार (वय २८ रा. वाफगाव, मांदलेवाडी, खेड) असे आत्महत्या केलेल्या तरुणाचे नाव असून याबाबत तरुणाचे वडील शांताराम गेनु पवार यांनी पारगाव ( ता. आंबेगाव) पोलिसांत फिर्याद दिली आहे.
याबाबत पोलिसांनी दिलेली माहिती अशी की, शेखर पवार हा खेड तालुक्यात राहणारा तरुण होता. मात्र, कामानिमित्त तो कुटुंबीयसोबत आंबेगाव तालुक्यातील पारगाव येथे राहत होता. शेखर याने तीन लग्न केली होती. मात्र, काही कारणांमुळे तिन्ही बायका त्याच्यासोबत नांदत नव्हत्या. त्यामुळे तो गेल्या काही महिन्यांपासून नैराश्यात होता. त्या नैराश्यातून त्याने घर देखील सोडले होते. वडिलांनी शोध घेऊनही तो सापडला नाही, अखेर वडिलांनी १७ नोव्हेंबर २०२२ ला खेड पोलिसांत मुलगा बेपत्ता झाल्याची तक्रार दाखल केली होती.
मात्र, पोलीस शोध घेत असताना आंबेगाव तालुक्यातील पहाडदरा गावच्या हद्दीत असणाऱ्या जंगलात त्याचा झाडा सांगाडा लटकल्याचे आढलून आले. गावचे असणारे पोलीस पाटील यांना ही माहिती समजताच त्यांनी याबाबत पोलिसांना तातडीने कळवले. पोलिसांना घटनास्थळी काही कागदपत्र आढळून आली असून त्यातूनच हा शेखर असल्याची खात्री केली. यानंतर शेखर याच्या कुटूंबियांना कळवण्यात आले. तीन बायका नांदत नसल्याच्या नैराश्यातूनच त्याने आत्महत्या केली अशी माहिती पोलिसांकडून देण्यात आली आहे.
सदर प्रकरणात मयत इसमाचा हाडाचा सांगाडा भेटल्यानंतर घटनास्थळी मिळून आलेल्या त्याच्या खिशामध्ये त्याचे आधार कार्ड आणि पॅन कार्ड मिळून आले. त्यावरून त्याच्या नातेवाईकांचा शोध घेतला असता सदर मयत इसमाचे वडील शांताराम घेऊन पवार हे घटनास्थळी आले. त्यांनी सांगितले की, त्यांचा मुलगा शेखर शांताराम पवार हा दोन महिन्यांपूर्वी घरातून आत्महत्या करतो असे सांगून दोरी घेऊन निघून गेला होता. त्याबाबत त्यांनी खेड पोलीस स्टेशन येथे मिसिंग तक्रार दाखल केली होती.
