पुणे : गाडी हळू चालवा, असे सांगितल्याच्या कारणावरून माळवाडी परिसरात एका महिलेला कोयते व तलवार घेऊन काही गावगुंडानी शिवीगाळ करत मारहाण केल्याची धक्कादायक घटना घडली आहे. रविवारी (ता. १५) सायंकाळी साडेपाच वाजण्याच्या सुमारास सिंहगड रस्त्यावरील गोऱ्हे बुद्रुक येथील माळवाडी परिसरात घडली आहे.
मिळालेल्या माहितीनुसार, सिंहगड रस्ता गोऱ्हे बुद्रुक येथील माळवाडी गावात सायंकाळी पाच वाजण्याच्या सुमारास स्थानिक महिला आपल्या घरासमोर बसली होती. व तिचे लहान मुले बाहेर खेळत होती. त्याचवेळेस रस्त्यावरुन दुचाकीवरून काही तरुण वेगाने गाडीने पळवत ये-जा करत होते. महिलेने मुलं खेळत असल्याने दुचाकीस्वारांना हळू गाडी चालवण्याची विनंती केली.
त्याचा राग मनात धरुन त्या तरुणांनी महिलेला शिविगाळ करत मारहाण केली. त्यानंतर पुन्हा काही वेळाने हातात तलवार व कोयते घेऊन ते तरुण इतरांना सोबत घेऊन आले व अर्वाच्य भाषेत शिवीगाळ करु लागले. संबंधित तरुण हे सराईत गुन्हेगार असल्याची माहिती स्थानिक नागरिकांनी दिली आहे.
दरम्यान, गावातील एका दुकानदाराकडून फुकट सिगारेट घेण्यासाठी या सराईतांनी त्याला धमकावल्याचीही महिती मिळाली आहे. गांजाची नशा करुन हे सराईत सातत्याने गावात दहशत निर्माण करण्याचा प्रयत्न करत असतात अशी माहिती एका नारीकाने नाव न छापण्याच्या अटीवर दिली आहे. या घटनेनंतर परिसरात दहशतीचे वातावरण निर्माण झालं आहे.
