वाघोली : पुणे – नगर महामार्गावर वाघोली हद्दीत ट्रकने पाठीमागून दुचाकी दिलेल्या धडकेत कोलवडी (ता. हवेली) ३८ वर्षीय शिक्षेकेचा जागेवरच मृत्यू झाल्याची घटना घडली आहे. सकाळी साडेआठ वाजण्याच्या सुमारास हा अपघात झाला आहे.
सुप्रिया सजित ढोबळे (वय-३८, रा. कोलवडी, ता हवेली) असे अपघातात मृत्युमुखी पडलेल्या शिक्षिकेचे नाव आहे. याप्रकरणी ट्रकचालकाला लोणीकंद पोलिसांनी ताब्यात घेतले आहे.
पोलिसांनी दिलेल्या माहितीनुसार, सुप्रिया ढोबळे या वाघोली येथील पोद्दार स्कूल मध्ये शिक्षिका म्हणून कार्यरत होत्या. आपल्या मुलीला शाळेत सोडून स्कुल त्या त्यांच्या शाळेत दुचाकीवरून निघाल्या होत्या. आय व्ही इस्टेटकडे जाणाऱ्या रोड जवळ महामार्गावर त्यांच्या दुचाकीला ट्रकची पाठीमागून जोरदार धडक बसली यामध्ये त्यांचा जागीच मृत्यू झाला.
दरम्यान, ढोबळे या मागील एक वर्षापासून पोद्दार स्कुल मध्ये शिक्षिका म्हणून कार्यरत होत्या. त्यांच्या मृत्यूने शिक्षण क्षेत्रात हळहळ व्यक्त करण्यात येत आहे. या प्रकरणी ट्रक चालकाला लोणीकंद पोलिसानी ताब्यात घेतले असून गुन्हा दाखल करण्याचे काम सुरू होते.
