शिरूर : उरळगाव (ता. शिरूर) ग्रामपंचायत हद्दीत एका ३० ते ३५ वर्ष वयोगटातील अज्ञात महिलेचा मृतदेह अर्धवट जळालेल्या स्थितीत आढळून आला आहे. या घटनेमुळे परिसरात एकच खळबळ उडाली असून या अज्ञात महिलेबाबत काही माहीती मिळाल्यास शिरुर पोलिस ठाण्याशी संपर्क साधण्याचे आवाहन पोलिसांनी केले आहे.
पोलिसांनी दिलेल्या माहितीनुसार, रविवारी (ता. ०८) दुपारी शिरूर पोलीस ठाण्याच्या हद्दीतील उरळगाव, चोरमले वस्ती जवळील पाझर तलावाच्या नजीक पुलाजवळ एक अज्ञात ३० ते ३५ वयोगटातील अनोळखी स्त्री आढळून आली.
तिच्याजवळ जाऊन पहिले असता तिच्या शरीरावर अर्धवट जळालेली चॉकलेटी, पिवळसर, सफेद फुलांचे नक्षीची साडी, चॉकलेटी रंगाचा ब्लाऊज, डाव्या हाताचे बोटात पिवळे धातूची पिळ्याची अंगठी, दोन्ही हातात काचेच्या लालसर बांगड्या, दोन्ही हातात पिवळे धातूच्या दोन – दोन बांगड्या, डाव्या हाताचे मनगटाजवळ गोल फुल गोंदलेले आढळून आले.
दरम्यान, अशा वर्णनाची महिला घरातून निघून गेलेली असल्यास अथवा कोणाच्या परिचयाची असल्यास तात्काळ शिरूर पोलिसांशी संपर्क करण्याचे आवाहन शिरूर पोलिसांनी केले आहे.
